سفر

صورة لتوسعة ( سيتي واك CITYWALK ) الجديدة في دبي

أمس رحنا للـ ( سيتي ووك CITYWALK ) في وسط دبي ودخلنا لسيفورا اللي هناك ويوم طلعت لفت نظري إنهم حاطين صورة التوسعة الجديدة للـ (سيتي ووك CIYTWALK ) ..

بصراحة التوسعة بتكون كمان أحلى من اللي الحين لانها بتكون طابقين وفي الدور الثاني مكاتب .. يعني المكان بيكون في خيارات أكثر .. بصراحة شغل مراس القابضة شغل مضبوط ومرتب وما شاء الله سريع يعني المشروع على طول يخلص ويتأجر والناس تجي ..

بس مشكلته إن لين الحين ما أعلنو عنه يعني حتى سواويق التاكسي لما نقول لهم سيتي ووك ما يعرفونه .. حتى لين نقول لهم تقاطع شارع الصفا مع شارع الوصل .. يحوقون شوي ..

بس جبت لكم رقم الباص اللي يوصل للمكان .. C14 ونوصل له من محطة مترو الخليج التجاري من جهة البحر ..

وأتوقع مع التوسعة الجديدة لين خلصت .. ما يحتاج باص لان بس ننزل في محطة برج خليفة دبي مول من جهة البحر وبتلاقيه في وجيهنا ..

مقالات ذات صلة

6 تعليقات

  1. اهلاً ياجميله❤️
    اكتشفت مدونك الرائعه من قوقل من خلال بحثي عن السيتي ووك
    شكراً على المعلومات ومشاركتك لنا يومياتك
    قريت عن مدونك واعجبت بشخصيتك انسانه بسيطه وجميله
    سؤالي هل السيتي ووك على امتداد الجي بي ار ؟ واذا عندك احداثيه للمكان اكون شاكره لك❤️

    1. تسلمين إختي 🙂 من ذوقك ولطفك ..

      لا والله السيتي ووك مش على إمتداد الجي بي آر اللي مثله وفي الجي بي ىر إسه ذا بيتش ويشبه كثير السيتي ووك ومطاعمة جميلة وبإطلالة مباشرة على البحر..

      أما السيتي ووك فهي جنب دبي مول يعني كنك رايحة لجميرا .. إذا كنتي في شارع المركز المالي ومتجهه غرب بالاقين السيتي ووك على طول يعني بين مركاتو وبين برج خليفة.
      ووصفه بالضبط منطقة الوصل تقاطع شارع الوصل مع شارع الصفا عند بنك الإمارات دبي الوطني وصيدلية لايف.

  2. شكراً جزيلاً اختي وصديقتي الانترنتيه الجديده❤️❤️❤️
    صحيح مررره يشبهه انا رحت ل ذا بيتش من صورك طالع كانه نفس المكان
    اخر مره زرت دبي قبل سنه ونص
    والان انا موجوده فيها الصراحه منبهره من التغير اللي صار ماشاء الله
    كل شيء جممميل وجديد ودي اخمم دبي احببببها هي واهلها ماودي ارجع الرياض :’)❤️❤️❤️❤️❤️❤️

    اخر سؤال بوليفارد جنب السيتي ووك ولا كل واحد بمكان :p

    1. هلا بك .. عزيزة وغالية 🙂
      وفيه أشياء كثيرة جميلة .. إن شاء الله تجينها في البرد وتستمتعين في الجو الزين كمان ..
      بوليفادر محمد بن راشد سلمك الله هو الشارع اللي محاوط دبي مول .. يعني لو طلعتي من البوابة اللي عند بتيل وستاربكس ومشيتي نصيتي الشارع ولقيتي القهاوي .. هذا هو الشارع وهو شارع دائري بطول 3 ونص كيلومتر حول برج خليفة!

  3. ممكن سؤال عزيزتي شنو اقرب فندق للسيتي ووك او شقق فندقيه يعني اقدر اروح له مشي في جو حار تقريبا قبل عيد لاضحى باسبوع ؟

    1. فيه فندق شنغريلا شارع الشيخ زايد وفندق سوفتيل داون تاون هم أقرب شي للسيتي ووك بس أنا أنصحك كمان في ذا بيتش ( http://wain.me/travel/8687 )
      لأنه له طلاله مباشرة على البحر وممشى مطاطي وأآلات رياضية والمكان مره جميل كله مطاعم ومقاهي وبوتيكات وله أكثر من 20 فندق ملاصق فيه وكمان فيه سينما ريل ومنطقة المارينا تقدرين تروحين لها كلها مشي .. هي صدق الحين فيه حفريات الترام بس على وشك الإنتهاء يعني كلها شهر ونص وبيتم إفتتاح ترام دبي اللي بيكون مثل المترو وحلقة وصل بين منطقة المارينا والمناطق القريبة منها.