تقنية

شركة “أبل” بتطلق آي باد 3 اللي يدعم خدمات الجيل الرابع في مارس

حسب موقع رويترز الإخباري يقولون أنو جريدة “وول ستريت جورنال” والجريده تقول أنو نقلا عن مصدر مطلع إن شركة أبل تعتزم الإعلان عن طراز جديد من الكمبيوتر اللوحي “آي باد 3”  واللي يدعم خدمات الجيل الرابع في الاسبوع الاول من مارس.

طبعا لين الحين الكلام إشاعة وما تأكدوا من الخبر ..
ياناس توا العالم ما بعد فرحوا في آي باد 2 .. قاموا على طول نطحوهم بآي باد 3 ..
أنا أظن اللي عندهم آي باد 1 ممكن يشترون على طول آي باد 3 .. بس اللي عندهم آي باد 2 .. ما أظن فيه دافع للشراء !! مجرد راي ..

مقالات ذات صلة

29 تعليقات

  1. يعني ابيع ايبادي مثلا .. ايباد ٢ احس ماناقصه شي ولكني اشوف ان الجيل الرابع يسوى انك تبيع ايبادك وتشتري جديد .. اتوقع تنزل اسعار الايباد ٢ بالايام الجايه

  2. شوف والله يا سلوم لا تقول لي جيل رابع ولا جيل ثالث حنا يالسعوديين نزبن في البيوت عشان كذا الكرف كله على الواي فاي سواء أي باد أو آي فون أو أي جهاز ..

    يعني ما فرقت .. غير إني مشتركة 1 جيجا في STC ومره بطئ .. بس لين رجعت البيت أنواع السرعه لأني أشبك على الواي فاي ..

    أنا والله أقول إقعد على قردك لا يجيك اللي أقرد منه .. 🙂

  3. ههههههههه هو صحيح اني ازبن طول الاسبوع لكن الصدز اشتغل على الثري جي اذا جيت سدير .. بحكم اني ما اقعد بالبيت ابد والايباد يتنقل معي فتلقيني اضطر للثري جي .. وفوق اني مشترك بالباقه المفتوحه ب٣٦٠ ولا استخدمها الا ويك اند بس بسدير الا اني اعتبر الفور جي جدير بالاهتمام اذا ثبت فعلا انه يفرق عن الثري جي بواجد والا على قولتس اجلس على قردي لايجي اقرد منه ..

    1. والله أنا منصحه لك ياسلوم .. ترا يقولون إنها 4 جي وبالأخير تطلع 3 جي وحنا ما ندري وإلا يعني رحنا شفنا سيرفراتهم ههههههه .. الشي اللي مو على نظرك يالإنسان وإلا ما تدري عنه ..

      أنا أقول خلك على آي باد 2 وعن الخساير 🙂

      ومادامه مقضي معك ويمشي حاله .. شي ممتاز .. من أول الجهاز يطيح ويكح ويشرق ولا نجيب خبره لين ما يموت .. الحين مير من يعطس نطير نجيب جديد .. منا صاحين مع هالأجهزه ذبحونا 🙂

  4. هههههههههههه كنتس داريه انه مأنبني ظميري بسبب لابتوبي كان ولا احسن منه وماشي مزبوط معي ومير اروح اطق لي لابتوب جديد واسحب على الاول ثم بعدها بشهر اشتري الايباد ومير اسحب على الاثنين كلهن ههههههه مير الله لايغير علينا والله من جد صرنا نفسق بالاجهزة ..
    خلي التجربة للايباد الجديد لهالعالم ان قالو زين وجربناه مع احد وجاز لنا الله يعيننا على الخساير نروح نشتريه وان تسانه ماعليه حتسي يفتح النفس مالنا الا حبيبنا الاولي

  5. طلع الصدق .. أجل إن من النوعية اللي تنطل اللاب توب والأزرار نصها طايحه هههههههه

    والله عاد إنها كانت تكرف ووش زينها تقعد 3 سنين وحنا نضحك الحين الأجهزة الذكيه صايره خرطي لو يكمل 6 شهور زين مير ذا اللي يقعد سنا مجاهد ..

    المهم لين شريته علمنا كانه زين .. بس بو شاريته .. كانه بيجي هديه ما قلنا شي 🙂 ههههههههه

    أبو بلاش ما يتهياش

  6. ههههههههههههههههههه والله جازت لي الفكرة شكلي بجلس انتظر هديه .. مير الله يخلف علينا مهنا احد يهدي :p

  7. طبعا تقدر .. إن شاء الله ..

    تروح لموقع : http://en.gravatar.com/

    وسجل حساب بالبريد الإلكتروني اللي إنت تستخدمه في الردود على المدونات ..

    وبعدين اختار الصورة ورفعها في الموقع اللي قلت عليه وإختار إن الصورة تكون G عشان يعني إنها صورة الكل يقدر يشاهدها

    وبعدين تلقائياً من تكتب بريدك الإلكتروني تظهر الصورة الرمزية اللي إخترتها وتقدر تعدل الصورة في اي وقت ..

  8. حسبي الله على زليلين مخافة الله .. ههههههههههههههه
    طريقتهم سخيفة .. ايش اللي كل شوي ينطحونا بجهاز.
    واللي يقهر إنهم يزيدون فيه ميزة أو ميزتين بس عن الجهاز اللي قبله ..
    ليه طيب .. ليه ؟؟

    1. أتوقع نذاله من الشركة وإلا مافيه سبب ثاني مقنع هههههه ..بس تعالي هنا المشكله مش في الشركه المشكله فيكم أنتم يالضعوف .. تبون توصلون مواصيل الشيوخ وتناطحون شركة أبل .. يمي هذي بحورها عميقه هههههههههههه
      لو بتقعدين تجارينهم بتلاقين نفسك على الحديدة .. هذا إذا لقيتني حديده بعد تقعدين عليها 🙂

  9. هذا المشكله يالمى انو مافيه فرق الا حاجه بسيطه وعلى قولة هلا ماتسوى انك تغير جهازك جديد عشانها !!! مير لعلنا مانستعجل بالحكم عليه كود يصير فيه ميزات تفرقةوالصراحة ماتوقع انو فيه شركه مثل ابل بتقدم على خطوة موب حاسبة حسابها ..صعبه تنزل ابل جهاز جديد بدون ميزات تفرق وتخسر مثل خسارتها التقديريه بالايفون فور اس .. ولوهم مؤمنين كان قلت المؤمن لايلدغ مع الجحر مرتين .. لكن ممكن يخطون ابل للمرة الثانية وينزلون هالاصدار وتكون العواقب وخيمه .. الله يذكر ايام نوكيا بالخير من كان يتوقع تخفس هالشركة بعد ايام العز

  10. إيه والله إنك صادق يا سلوووم .. الذيب ما يهرول عبث .. وعلى قول هلا ذا الجماعة ما يطقون الطار مقلوب لووول

    من جد .. نوكيا من يصدق إنها تختفي بهالشكل من بعد السيطرة والقوة .. أمم سادت ثم بادت و نظرية التفاحة اللي قال عنها ابن خلدون تنطبق حتى على شركات الأجهزة بكل أنواعها.

    هذه كوداك أعلنت إفلاسها بعد 133 سنة من تأسيسها. كوداك اللي كانت الأم الروحية للصور و لكل لحظة مهمة في حياتنا .. لدرجة إنه كان في جملة زمان تستخدم لوصف المشاهد المهمة في حياة البشر يقولون:
    It’s a kodak moment
    والحين ماكووو كوداك لأن مبيعاتها كانت تعتمد على أفلام الكاميرات والحين هجوم الكاميرات الرقمية و طابعات الصور قضى عليهم.

  11. هههههههه هلا دايم امثالها يضرب فيها المثل :p
    مايطق الطار مقلوب جازت لي هههههه

    صدقتي مثال حي وعايشينه ايضا بالوقت الحالي كانون هي مع النيكون مكتسحه السوق ولو اني من عشاق نيكون لكن اتوقع نهايتها قريبه اذا ماتحسنت بمواصفات كاميراتها وعلى الاقل تحاول تكون افضل من كانون ..
    عسى الله يرحم حالنا لو تطلع شركة جديده باتسر تطامرنا نجرب وش مواصفاتها ووو ونقول لعل وعسى تنافس الشركات ينزل الاسعار موب مثل جهاز البلاكبيري الجديد ابو ٧ الاف ..وشذا اللي بيشتري جهاز جوال بسبع الاف والله لو انه يضمن لي ماتجيني فواتير سنه قدام !!

  12. يا سفاب نيكون والله انا زيك أحب نيكون مرة .. وهي الكاميرا اللي أستخدمها في صور مدونتي حالياً.. بس لما رحنا هونج كونج السنة اللي فاتت قلت لاااااازم أشتري كاميرا من مبدأ إن كنت في روما فتصرف كالرومان هههه أما أصير بين ذا اليابانيين والصينيين ولا أشتري كاميرا؟؟ لا يمكن طبعاً.. وبالفعل اشتريت كانو وش حليلها والله .. تصويرها مرة زين ما شاء الله و سعرها معقول 1600 ريال تقريباً.

    والله فواتيري الحمد لله مرة خفت بعد البلاك بيري وهذا واحد من الأسباب اللي مصبرتني عليه .. يعني أول كانت المسجات لحالها ميزانية في فاتورتي .. بس الحين يالله من فضلك.

  13. تراتس تكلمتي عن الكاميرات مع واحدن يخقخق عندهن .. ولازالت متحسف كيف بعت كاميرتي اللي نشأت معي منذ القدم ولابعد اشتريت كام غيرها .. كان معي كام ١٠٠٠ دي وبعتها بعد الحااااااح عليها واحد من اخوياي كل يوم يدق هاه بتبيع :///
    وللحين ودي بسفن دي كانون وودي ب٩٠ دي نيكون كل وحده تقول انا اطلق من الثانيه ..
    مير وش كامك اللي شريتي والله سعرها جميل واذا فيه امكانيه نطلع على صور المدونه كان فيها صور لهونق كونق ق١ ق ١

    انا المشكله جوالي ما اكلم فيه الا ١٠ دقايق يوميا مع ابوي ومع ذلك اقل فاتوره تجيني مقاربه للالف بسبب البلاكبيري ومدري هل موبايلي يلعبون علينا والا وش السالفه .. شكلي افتح المقاطع على حسابي ولو اني مشترك ب١ قيقا .. الله يعين بس

  14. أجل توافقنا بسالفة الكاميرات ..
    شوف يالشيخ كانون اللي اشتريتها من هونج كونه نوعها
    Canon IXUS 210

    وشوف بعض الصور اللي التقطتها بعدستها في هالموضوع:
    http://www.trendyflamingo.com/travel/hong-kong-an-asian-jewel
    و إذا تبي صور زيادة حطيت لك بكرة انقي لك كم صورة حلوة وأحطها في حسابي حق انستغرام ..

    والله انا بعد شريحتي موبايلي .. بس ما توصل 1000 إلا إذا فتحت البلاك بيري وانا مسافرة برا المملكة .. وإلا العادة تكون حول الـ 500. لاني حاطة حد ائتماني و ماخذة أقل باقة اللي هي باقة نجمة. وهذه إجراءات وقائية عملتها بعد ما اس تي سي خذوا ما وراي و دوني هههههه قعدت سنين وانا انق آلاف مؤلفة .. لو شارية فيها أرض كان احسن لي.

  15. سيبت يالمى على الصور واخذت لفه والله وجازت لي تصوير هالكام واذا ماكنت واهم فهي نفسها مع ولد عمي يقول شراها من الكترو عليها عرض اخذها ب١١٠٠ اتوقع وفيها صورة بانورامية ولا احسن منها تغني عن العدسات اللي بذيك العده
    مير جبتي طاري الانستغرام وذكرتيني اسجل فيه هههههه لي فترة كل ماجيت اسجل سهيت ونسيت
    هونق كونق والله مارحت لها لكن على كلام واحد من اخوياي راح لها هووواهله انها جنه وتفتح النفس ديرة ناطحات السحاب .. كود اذا اعرسنا نخت لها كم يوم ههههههه الله يلحقنا خير

    اجل الظاهر مالي الا الحد الائتماني شكلي بخليه ٣٠٠ كان فيه واجزم اني ماراح اوصل ٣٠٠ بمكالماتي .. الواتس اب والبي بي يكفي ويوفي ويقضي لزوم واجد
    هههههههههههههههههههه من جد كان تملكين لتس ارض بطريق الملك فهد الحين :p
    على الطاري عندي سؤال لمى اذا مافيه احراج .. انتي كنتي معنا ببنت نت ؟

  16. لااااازم تسجل .. الصراحة إنه تطبيق جميل و يسلي و يخليك تفكر و تبتكر صور حلوة !
    إيه والله هونج كونج بلد عجيـــــــــــــبة حبيتها وحبيت أهلها و حبيت السهولة واليسر اللي فيها .. خدومين و محترمين جداً جداً جداً ما شاء الله عليهم!

    ايه والله يا سفابي وأنا قروشي رايحة في الهذرة و ما شريت أرض .. خليتني أتشره الله يهديك يا سلوووم ههههههههه

    طبعاً كنت في بنت نت!! بس تحتفظ الجريدة باسم العضو ! ههههههه

  17. ايه يالمى اجل شكلك من الاعضاء اللي كنا نحتري متى يرد احد منهم ذاك الوقت ههههه
    شلة قديمة والله خويات هلا نسيت اسماءهم والا لوني بنشاطي ذيك الايام وفطانتي <اها بس
    كان طلعت وش اسمتس ههههههه عموما تشرفنا ياطويلة العمر

  18. بالله الحين ايباد3 يشتغل عليه الجيل الثالث. 3G لانهم يقولون 4G مايشتغل بالسعووديه تكفووون الله يسعدكم ردو عليه وسرعته كيف ؟؟ 

    1. صحيح اللي سمعتيه ما يشتغل الجيل الرابع في آي باد الجديد في السعودية لأن التقنية اللي استخدموها في الآي باد الجديد .. ما تتوافق مع الشبكات المحلية في الخليج كله مو بس السعودية.

      1. الله يخليك طيب 3G يشتغل عليه ؟؟
        مشكووره االرد علي الله يسعدك ،