تقنية

وش طرتوا ووش ما طرتوا فيه من برامج ومواقع التواصل الإجتماعي

من بدأ الإنترنت و صار التواصل مدهش بين البشر، والناس صارت مندمجة بشكل كبير في هذا العالم الواسع كل يوم تستكشف جديد ولكن عندنا الناس كل شوي تطير في موقع أو برنامح للتواصل مابينهم عبر شبكة الإنترنت.

في البداية كانت مع برنامج المحادثة الشهير الـ mIRC  وبعدين برنامج الـ ICQ ومن بعده الـ بال توك وبعده الـ ماسنجر MSN اللي لين الحين يقاوم تقريباً، وبعده Skype وبعده المنتديات أشكال وألوان وبعده دردشة الـ ديجي تشات وانتشارها الغريب والـ netlog والـ Hi5 بس هذا قفلوه في السعودية لأنه صار مره بزياده ! وبعدها طل علينا الموقع الأعجوبة الـ فيسبوك اللي كل الناس اشتركوا فيه والبعض أساء استخدامة لدرجة أنو بعض الشباب منعوا خواتهم من الإشتراك فيه !
وفي الفتره نفسها فيه موقع لينكدإن بس هو في مجال العمل والوظائف عشان كذا ماجته طيره مثل الفيسبوك والـ ماي سبيس ماكان له من الحظ نصيب عندنا ، بس طارو شوي في فليكر حق الصور وصار كل الناس يصورون، بعده بفتره مو بعيده كل الناس بلا استثناء صار عندها ماسنجر البلاك بيري والـ واتساب وبعدين بدأت ثورة المدونات وصار كل شخص عنده مدونه في الوردبرس أو بلوجر أو تمبلر أو غيرها وصار الإستخدام الآن مكثف على موبايلات الهواتف الذكية والأجهزة اللوحية مثل الآي باد فصاروا الناس تشترك في تطبيقات مثل فورسكوير وجوالا لتبادل الآراء على أماكن اللي يزورونها وتحديد مواقعهم  وفيه كمان جوجل بلس من مبدأ خشوني لا تنسوني نزلت لها شبكة إجتماعية ولكن الذكور أكثر في الاشتراك فيها من الإناث حسب إحصائيتهم ولا يعرف السبب ! والحين اللي متربع على عرش طيرة الناس هو الـ تويتر بلا منافس في الوقت الحالي لين ما يطلع لنا شي جديد !!

ومن شدة طيرة الكون كله في تويتر قام الوليد إقتنص الفرصة واشترى حصة إستراتيجية من الموقع .. خذوا بالكم إن أنا مستفزتني استراتيجية هذي لأن مدري وش معناها بالضبط !!!

المهم من كل هالبرامج والمواقع وش الشي اللي مستمرين فيه ؟ ووش الشي اللي قاطعتوه أو سفهتوه !

مقالات ذات صلة

4 تعليقات

  1. صدقتي والسبب كل ما كان البرنامج سهل الاستخدام في التواصل كل ما كان اسرع انتشارا

    لكن اغلب اللي ذكرتيه مواقع وبرامج عامه

    في المواقع والبرامج اللي تكون مخصص لفئه من الناس
    في اخر ٦ شهور لاحظت فئه كبيره من العرب تشترك في قوود ريدز (وهو مجتمع مخصص لمحبي القراءة و الكتب) وعندج ماي انمي لست ( ومن سنتين فيه العرب بكثره وهو لمحبي الانمي الياباني والمانغا) و من ٣ سنين في هوس للناس اللي تعشق لعب الاونلاين جيمز في موقع اكس فاير < وديفيانت ارت المخصص للفنانيين والرسامين...<<وهذي اغلبها مواقع اجانب لكن الحلو ان المستخدم العربي صار يعرف كيف يستفيد ويشارك في هالمواقع اكثر عن قبل واللي كان فيها بس متلقي والسموحه لو طلعت شوي عن الموضوع ^ـ^

    1. أهلين يا آمنه

      أنا قصدت اللي تصير علها طيره وطيره قويه يعني كل الناس تقريبا يدخلونه الكبار والصغار يعني الهبّه اللي يهّبون فيها وإلا فيه مواقع الفايده منها كبيره مثل ما قلتي على موقع قود ريدرز اللي أعرف عنه لكن موقع انمي لست أعرفه توني اسمع عنه منك ..

  2. الحين الباث صاير موضه path

    لكن على كل حال هناك اختلافات بين الموقع الاجتماعي وبرامج الشات
    فمثلا السكايب لازلت استفيد منه كثيراً علي الايفون والماك .. من خلال محادثات الفيديو او الصوت ويعتبر الاقوى والاكثر تطوراً
    وتويتر اصبح احد اساسيات السياسه الكويتيه
    والانستجرام للي مثلي مايحبون كثرة الكلام فتصبح الصور المعبر الوحيد

    المسن ماعنده سالفه … صار ماضي مثل الام اير سي

    1. أنا شفت الباث في الستور يوم كنت أبحث عن المدونات بس ما أدري عنه إنه هبه .. شطلي بنزله وأعرف وشو يعمل بالضبط..

      أكيد فيه إختلاف صادق السكايب ميزته مره قوية في التواصل الصوت والصورة.

      وكل اللي ذكرته فيه ميزة تختلف عن الثاني مثل ماقلت 🙂