أكل

مطعم “سماش برجر” الرياض .. مقلب و وهقه !

قبل كم يوم رحت لمطعم توه فاتح في الرياض اسمه “سماش برجر – Smashburger” .. بصراحه الله يسامحهم .. استاثموا فينا في قسم العائلات .. لأن شكل اللي يصرف الهوا في المطعم يا إنه ما يشتغل أو إنهم نسوا يركبونه .. لأن المكان كآن شاب فيه حريق .. ما قدرنا نتنفس من دخان شوي البرجر !!

زائد أن الستاف اللي يشتغلون في المطعم مره منعكس عليهم الحر والدخان ونفوسهم صايره عند خشمهم .. أنا ما قدرت أقعد وقلت نبغى الطلب خارجي قالوا لنا : لأ ما فيه في هالفتره طلبات خارجية .. بس قلت له مستحيل أقعد ،، قام قال خلاص غلفوه وعطوها والفلبيني اللي أخذ مننا الطلب مره نفسه خايسه ويوم وصلنا البيت قد البرجر صار بارد وتخبرون البرجر ما ينوكل بارد أبد يصير حواق الله يكرم النعمة ..

المهم إن تجربتي في المطعم جداً سيئة وكمان ما عجبني ديكوره ولا شي دخل ذمتي في هالمطعم  .. اللي أتوقع إنهم استعجلوا يوم فتحوه رغم هالمشاكل اللي فيه ..

تقييمي له صفر من عشره ولا تهمكم الصورة تراها من الموقع الرسمي لهم ..  رزه بس وألا الطعم عادي جداً ..

 

مقالات ذات صلة

6 تعليقات

  1. للأسف كثير من المطاعم العالمية إذا فتحت فروع في الرياض يكون مستواها اقل من فروعها برا السعودية

    لكن للأمانة تجربتي لسماش برجر في قسم الشباب البرجر رائع لكن يعيبه الزحمة والإنتظار اكثر من 45 دقيقة للطلب

    1. صادق أخوي أحمد .. وأنا لاحظت هذا الشي في فات برجر

      أنا مثل ما قلت لك يمكن لأننا أخذناه البيت وبرد عشان كذا ما جاز لي

      وترا قسم الأفراد مافيه الدخان مثل قسم العائلات اللي مرة الوضع فيه مأساوي

  2. جربته قبل يومين واخذته للبيت والسندويش مافقدت سخونتها ولذتها .. صراحه اللي جربتها لذيذه ..

        1. توقعت كذا .. لان الأكل في الكويت شي ثاني .. بصراحة المطاعم في الكويت المذاق فيها لا يقاوم .. ما شاء الله تبارك الله