بعد جولتي الجميلة في سينسيت مول واللي كتبت عنه موضوع سابق في المدونة بعنوان ( بالصور: سنسيت مول .. مركز البوتيكات الراقية بجدارة #دبي ) و قلت في الموضوع إني بتكلم عن كافيه ( سبيل ذا بين Spill the Bean ) اللي أثناء جولتي لفت نظري ديكوره الخشبي المميز بالألوان الداكنة مع خلط مع بعض ألوان الباستيل الفاتحة اللي أعطت الإنسجام في المكان وجعلته مكان مريح للنظر .. أول ما لفت نظري شياكة الكافيه والطابع الأوروبي الجميل اللي يطغى على المكان ..

ومن حرصي على إني استكشفت الكافيه قابلت صاحبتة اسمها  (علا ) شابه لبنانية رحبت فيني أجمل ترحيب وقابلتني أحسن مقابلة وقدرت إني أعمل معها مقابله بسيطه عشان أعرف أكثر عن الكافيه .. وسألتها مين اللي عمل الديكور وليه جا إختيار سنسيت مول وأسئلة كثيرة ..  وقالت لي إنها هي اللي صممت الكافيه من إلى .. مع إضافة بعض القطع الجاهزة مثل بعض من الكراسي .. أما التوليفة العامه هي اللي كانت وراء هذا العمل ككل لأنها هي جرافيك ديزاينر.. وقالت لي إنها هي شخصياً تعشق القهوة وعشان كذا حرصت إنها تقدم قهوة تفخر فيها وكل شهر يجيبون القهوة من مناطق مختلفة يعني مثلا هذا الشهر جايبين القهوة من كولمبيا ومن بيرو ومن أثيوبيا ومن منطقة اسمها هرار وهي 100% أورجانيك ومطحونه فرش والمميز في القهوة إنها خليط بين أنواع مختلفة عشان تعطي مذاق مميز يختص فيه الكافيه اللي هي شخصياً تعتبره كافيه الحي وهي ثقافة غير موجوده حالياً في دبي لأن معظم الكافيهات هي لعلامات تجارية عالمية ولكن الأمر هذا حديث في دبي وبدأ ينتشر شوي شوي .. اللي هي كافيه الحي أو بما يسمى (Neighborhood Cafe) وكافيه الحي هو مكان نتلاقا فيه أو نقعد فيه بالساعات ويكون هادي والخدمة تكون فيه مميزة والأهم إنه يكون بريح عشان نقدر نقرأ أو نشتغل لأن خدمة الواي فاي متوفر ومجاناً في الكافيه.

وللقراءة حيّز مهم في المقهى بسب تعاونهم مع ( ملجأ الكتاب The Book Shelter ) اللي هي مبادرة إماراتيه تركز على جعل الكتاب في متناول الجميع دون مقابل عشان دعم القراءة.

ومو بس هذا الشي اللي موجود في الكافيه اللي بتصير دايم تقام فيه الأنشطة وتوجد فيه سبورة معلقه فيها كل الأنشطة اللي بتقام بحيث اللي مهتم يقدر يحضر ويشارك ويستفيد .. وكمان توجد غرفة مستقلة مخصصة للأطفال.

وكرت الولاء أيضا متوفر بحيث لو حصلنا على 9 أختام للقهوة في كل مرة نروح العاشر يكون مجاناً.

ومو بس القهوة اللي يميز الكافيه كمان الأكل .. بحيث يتم تقديم مخبوزات خالية من الجيلوتين وبعض الأطعمة الأورجانيك مع كل الحرص إنه يكون طعام صحي.

ونجي الحين لشعار الكافيه وهو شعار غريب ومميز في نفس الوقت .. وسألتها عن سر إختيارهم للماعز اللي بجناح في شعارهم للكافيه وقالت لي إن الشعار مستوحى من قصة إكتشاف القهوة ( في مدينة غير معروفة في أثيوبيا كان راعي يرعى الغنم ولاحظ إن الغنم اللي يرعاهم ياكلوم من نبته صغيره لونها أحمر وبعد ما ياكلونه يدب فيهم النشاط والحيوية ؟! وجرب إنه يذوق النبته الحمراء ولكن ما استساغ طعمها ورماها في النار وطلعت منها ريحة مره عجبته و بعدها فكّر إنه ينقعها في موية ويشربها .. لأن هو ربط بين حيوية الماعز وين النبته عشان كذا جاها من كذا طريق ويوم جرّبها كشراب بدأ يجيه نفس المفعول من النشاط والحيوية ومن هنا بدأ إكتشاف القهوة ..

بصراحة أنا جربت القهوة اللاتيه جميلة جدأ .. بس المرة الجاية إن شاء الله بجرب القهوة التركية اللي نصحتنا فيها مرة وقالت إنها تنعمل في الكافيه بالطريقة اللبنانية سواء بالهيل أو بدون هيل ، وأنا بدوري أنصحكم بزيارة هذا المقهى المميز .. بس هو لين الحين في الإفتتاح التجريبي ..