الأسبوع اللي راح  رحنا لفندق روزوود ابوظبي اللي في جزيرة المارية لتجربة المطعم الهندي الجديد ( سبايس ميلا Spice Mele ) .. الرحلة بالسيارة من منطقة المارينا إلى جزيرة المارية كانت تقريباً 50 دقيقة.

وصلنا للفندق واللي كعادة فندق روزوود أبوظبي .. إستقبال وضيافة مميزة .. أقدر اقول إنهم تلاقطونا من الباب إلين المطعم اللي ديكوراته كلاسيكية بطابع هندي شرقي يغلب عليه اللون البني مع مجموعة من البكرات الملونة اللي تلفت النظر في مدخل المطعم.

قعدنا في طاولتنا اللي تم حجزها لنا و هذي المرة قلنا خل نغير بدال ما إحنا نختار حسب ما نعرف .. يعني دايم في المطاعم الهندية نطلب البرياني والبامية والعدس والدجاج التندوري  وغيرها من الأطباق الشهيرة .. هذي المرة قلنا للجرسون وش هي أحسن الأطباق عندكم .. قام قال لنا وش أنتم تفضلون هل تفضلون اللحم أم الدجاج أم المأكولات البحرية .. أنا قلت لحم الغنم وصاحباتي قالو الدجاج والربيان .. قام قال أنا بأرشح لكم أطباق متنوعة ما بين اللحم والدجاج والربيان مع الرز الابيض والخبز النان وخبز والبراتا .. وللمشروبات طلبت لبن اللاسي المالح .. اللي من جد لذيذ وشهي ودايم هو خياري المفضل في المطاعم الهندية.

في البداية كانت المقبلات اللي جانا فيها ريش غنم ” ممتااااااازة ” ولا ألذ ولا أجمل وكمان صدور رجاج بالمكسرات طرية وشهية وربيان مشوي بالاعشاب..

والأطباق الرئيسية دجاج بالزبدة وهو من أشهر الأطباق الهندية و والربيان بالصوص و واللحم بالبهارات .. الأطباق كلها شهية ولا ينشبع منها ..

أما الحلويات كلام كبير لأنه بالشوكولاته .. اللي أعتربها إدمان بالنسبة لي .. الحلويات بالفعل رائعة المذاق والشوكولاته بنكهة شرقية .. أنصح فيها بشدة.

تجربة أكثر من رائعة .. إستقبال جميل .. خدمه ودوده ومكان رائع و مذاق لذيذ جداً .. في أمسية هادية و جميلة ..

ومطعم  ( سبايس ميلا Spice Mela ) تحت إشراف الشيف الهندي ( سيدارث كريشنا ) اللي قد أشرف على الطهي في بريطانيا خلال الثمان سنوات الماضية وأنتقل سيدارث لفندق روزوود أبوظبي من مطعم ( شاتني ماري ) في لندن.

والمطعم حالياً يفتح فقط في المساء لوجبة العشاء وأيام الجمع يفتح للغداء.

spice-mela-rosewood-abudhabi2