إن قلت لكم إن مطعم مطعم ( مارغريتا – Margherita ) في ( الممشى – جي بي آر – The Walk at JBR ) .. ألذ طعام إيطالي في دبي .. صدقوني..

الله عوضنا خير عقب مطعم مايريغ اللي من جد إنصدمنا فيه .. بس الحمد الله البارح .. وأنا من زمان عن ممشى الجي بي آر لأن كان رمضان وحر وبعدها صيام الست فما حصل لي فرصة إني أتمشى فيه .. وطبعا أنسب وقت هو وقت المغرب قبل لا تهبط علينا الرطوبه وبعدها ما نقدر نتنفس .. صدق المطاعم وقتها تكون فاضية .. وجنه من غير ناس ما تنداس .. بس والله نفسنا علينا ألزم ! بس يوم جينا نطلع إزدحم المكان بس بالداخل في الخارج الطاولات فاضية في هالوقت ! بس بعد شهر من الآن لين الجو بدأ يزين تدريجياً .. أظن ما عاد نلاقي طاولة في الويك إند مثل ما لقينا البارح.

نجي للمطعم اللي كل شي فيه مميز .. إن كان موقعه في المعلم السياحي الأبرز في دبي وهو ممشى الجي بي آر وهو مكان جميل للإلتقاء بالناس لكثرة المطاعم ووجوده بجانب شاطئ البحر .. عجبني مره الديكور الخشبي جميل وبسيط .. مع وجود طماطم طازجة على زجاج الفاترينة من الخارج .. شكلها مميز وملفت للغاية .. أنا بالنسبة لي دايم هذا الثيم من الديكورات الخشبية  أحس كأني في أحد مطاعم دول حوض المتوسط.

المكان جميل جداً و الخدمة سريعة و ودودة وشارلي قام بخدمتنا بأحسن حال وهو من هنغاريا ( المجر ) يعني .. أما الأكل هذا حكايه ثانية كل طبق أحلى من الثاني .. طلبنا شوربة مشروم وسلطة و ريزوتو بالفطر و ريغاتوني اللي بالباذنجان وبيتزا خضروات وبيتزا مارجريتا اللي لوحدها حكاااااايه .. ألذ بيتزا مارجريتا بصراحة .. تجنن .. مره مره إنبسطنا في المطعم وإستمتعنا بالأكل والجو المحيط فيه.

آخر شي عندهم لعبة يلعبوني هي .. نختار رقم من 1 إلى 90 وإذا تصادف الرقم اللي إخترناه مع الرقم اللي من الجرة تصير وجبتنا ببلاااااااش .. بس للأسف إخترت رقم 13 واللي طلع لنا رقم 50 .. وما كنا من المحظوظين : ( لأنه قال لنا اليوم محد فاز بس أمس 2 فازوا ما شاء الله.

أنصح اللي ما جرب هذا المطعم إنه يجربه في أقرب وقت ويقولي عن رايه فيه ..

وأترككم مع الصور اللي أخذتها للمطعم:

Margherita-Dubai-JBR2 Margherita-Dubai-JBR3 Margherita-Dubai-JBR4 Margherita-Dubai-JBR5 Margherita-Dubai-JBR6
Margherita-Dubai-JBR7 Margherita-Dubai-JBR8 Margherita-Dubai-JBR9 Margherita-Dubai-JBR10 Margherita-Dubai-JBR11