نفس الملاّك اللي أخذوا فرنشايز مطعم ” ليلي ” اللبناني واللي له فرعين في دبي الأول في مردف سيتي سنتر والثاني في منطقة وسط مدينة دبي في بوليفارد محمد بن راشد.

الحين هم نفسهم فتحوا مطعم جديد اسمه ” كريس كروس – Kris Kros ” ولكن ماهو فرنشايز عالمي وإنما هم اللي إبتكروه من الألف للياء، و اليوم رحنا للمطعم اللي موجود في برج بوليفارد بلازا في بوليفارد محمد بن راشد في منطقة وسط مدينة دبي (برج خليفة) .. ونصينا المطعم رغم إننا حسنا شوي لاننا جيناه من دبي مول عبر ممر المترو لأن المطعم في منطقة إعمار سكوير وهي منطقة جداً جميلة ومخصصة للأعمال وفيها مقاهي ومطاعم جميلة بس حلاوتها في الشتاء لانها منطقة شبه مفتوحة في الهواء الطلق وشبيهة بمنطقة مركز دبي المالي العالمي DIFC .. المهم إننا  قلنا بنجرب شي جديد وأكيد إنه بيكون لذيذ لأني أحب مطعم ليلي اللي أشوف إنه من أطيب المطاعم اللبنانية في دبي.

وحنا عرفنا عن المطعم عن طريق موقعه لأننا نلمحه على الطريق و خصوصا لإننا دايم نمر في البوليفارد في كل مرة نروح ونجي لدبي مول .. طبعاً بسبب إننا نستمتع بالشارع الجميل اللي إعمار عاملة شغل روعه وقاعدين يحسنون فيه ويضيفون أكشاك ومطاعم في كل الجانبين.

نرجع للمطعم اللي أخذنا فيه وجبة عشاء مع الأهل والأصدقاء .. أول شي ديكور المطعم اللي يشع بالألوان المبهجة والفسفورية والنيون وهي منطقة اللا مدخنين .. وفيه منطقة للمدخنين يفصلها عازل زجاجي ومنطقة المدخنين ديكوراتها داكنه وجوها فيه غموض .. وإن كنت أعيب على شي في الديكور .. فهو شي واحد بس إن منطقة المدخنين مرتفعة .. بحيث ممكن لو أحد كان لابس تنورة .. ما ادري وش بيصير .. ياليت يحطون تضبيب على الزجاج لأن الوضع مش مريح .. خصوصاً بعد إن المنطقة المرتفعة صايره رجول الناس في مستوى روس اللي في منطقة اللا مدخنين !

نجي للإستقبال والخدمة اللي هي بالفعل مميزة وفي منتهى الودية والإحتراف .. وبعدها نلتفت للأهم في كل شي واللي من أجله نروح للمطاعم وهي ” الأكل ” ومدى جودته  و طعامته وتعدده .. الأكل متنوع وحسب التعريف عن المطعم إنه طعام من حول العالم فيه الطعام الغربي والطعام الشرقي وطعام دول الحوض المتوسط وبصراحة الأكل شهي والعصاير لذيذة وطريقة التقديم جذاّبة .. وكانت طلباتنا برجر وساندويتش طاووق وساندويتش دجاج بدبس الرمان وسلطة كينوا وشوكوليت فوندو .. وهو نصحنا بطبق مره حلو عبارة عن ربيان بالصوص وشوية حار بس من جد لذيذ.. والكمية وافرة وبرأيي مطعم يستحق الزيارة ..

وتكلمت مع المسؤول عن المطعم وسالته شوية أسئلة كنت حابة أعرف شوية معلومات واللي قلت لكم عنها في بداية الموضوع ، واللي توصلت له من أجواء المطعم اللي تبعث على البهجة والمرح إنه مطعم شبابي بنمره وإستمارة لأن كمية الطعام جيده والاسعار ممتازه كمان .

وبالأخير طلبنا الفاتورة وجابوها لنا في مقلمة حديد مثل من أول .. حبيتها ..

أترككم مع الصور اللي أخذتها للمطعم وللأطباق :

KrisKros-dubai2
KrisKros-dubai3
KrisKros-dubai4
KrisKros-dubai5
KrisKros-dubai6

حبيت المقلمة : )

KrisKros-dubai7
وهذي الملعقة أو الشوكة .. حج وقضيان حاجة

KrisKros-dubai8
KrisKros-dubai9
وأبشركم هذا خوينا اللي حاف بنا حوف : )