قبل كم يوم رحنا وتعشينا في مطعم أرمني جديد توه فاتح في بوليفارد محمد بن راشد في وسط مدينة دبي .. موقع المطعم مرة حلو وشكله الخارجي ملفت وكمان ديكوراته الداخلية اللي مستوهاة من الأجواء الريفية بالألوان الدافية الجميلة ..

وكان الإستقبال جميل وقعدنا على طاولة في الطابق الأرضي لأن المطعم مكوّن من طابقين .. وأنا كنت محتارة وش أطلب لأني ما أعرف هذا المطعم أبد .. بس بعد ما إستفسرت من الجرسون قال إنه مطعم في لبنان وكمان عندهم فرع في جدة ..

قلنا له وش ترشح لنا من الأطباق اللي تشتهر في مطعمكم يعني وش ألذ شي واللي كثير طيّب .. قال كل شي عندنا طيّب .. قمنا توكلنا على الله وطلبنا تبولة أرمنية وطلبنا كبة بطاطا باردة وبرك بأنواع الجبنة وكفتة بالزيادي وبرك بالسبانخ .. وما أكذب عليكم إن قلت لكم كل الأطباق عادية إذا ماكانت أقل من عادية ! يمكن كبة البطاطا كانت أهون شي .. مير قمت آكل في الكرنب اللي جا مع التبولة من غير رايي ! بس أتوقع إننا ما توفقنا في طلباتنا .. لأن وحنا في المطعم كنا نقول .. هذا المطعم جيناه مره ولا حنا مثنينها .. من كثر ما حنا مصدومين من طعم الأكل .. ولكن .. أغلب الظن إننا ما توفقنا في طلباتنا يمكن نروح مرة ثانية نطلب طلبات ثانية غير اللي طلبناها ونجرب ونشوف يمكن نكون  ما توفقنا في الطلبات.. لأن من جد مستغربة كيف يكون الطعم بهالشكل .. أقدر أقول إنه غير لذيذ بالمرة !

يعني من زيارتي الأولى له أعطيه 5 من 10 وكلها للخدمة والديكورات أما الأكل ماله من النسبة نصيب !

mayrig-dubai2 mayrig-dubai3 mayrig-dubai4 mayrig-dubai5 mayrig-dubai6 mayrig-dubai7 mayrig-dubai8 mayrig-dubai9