اليوم طحت لكم على طيحة .. كنا رايحين دبي فيستيفال مول ولقينا دعايات في كل مكان لكافيه جديد اسمه .. ” تشوكولاتي إيتالياني – Cioccolat Italiani ” وتوه فاتح ماله أقل من شهر .. سألنا كونسيرج المول عن موقعه بالتحديد وقالوا لنا إن الكافيه على الووك كنال وبالفعل لقيناه في الوسط بين يو سوشي وبين فدركرز .

ديكورات المكان جداً جميلة والألوان مستوحاة من الشوكولاته اللي مغلفه المكان كله ويقدم كل شي شوكولاته وفيه جيلاتو وكمان يبيع شوكولاته لذيذة جداُ  .. أنا شخصياً حسيت إني في الجنه .. لأني أعشق شي اسمه شوكولاته.

وكمان المطعم له إطلالة مائية على الووك كنال .. وكان الجو جميل رغم إننا في آخر شهر مايو اللي يعتبر خلاص يونيو على الأبواب والحر ما يرحم ..

استمتعنا في جلستنا في المطعم واستمتعنا بالقهوة والشوكولاته .. بس المشكله الوحيدة اللي نواجهها إننا في دبي مارينا والمقهى في دبي فيستفال سيتي يعني نضرب مشوار مو هيّن .. بس إن شاء الله يفتحون فرع في دبي مول ويكون في وسط المدينة. الله كريم 🙂

أنصح كل عشّاق الشوكولاته إنهم يروحون له .. لأنه من جد مكان يستحق الزيارة مرة ومرتين وثلاث ووو …..