قبل أمس رحت أنا وصديقتي لولو صاحبة مدونة “ترندي فلامينغو – TrendyFlamingo” لمطعم “هاكاسان الصيني واللي موجود في بوليفارد أبراج الإمارات في الطابق الأرضي بجانب كارتييه .. والمطعم فيه خدمة صف السيارات المجانية بشرط ختم التذكرة ..

و بصراحة أنا لي فتره عن البوليفارد بس لاحظت إن فيه مطاعم جديدة تم إفتتاحها .. والبوليفارد كان هادي ومريح .. ودخلنا للمطعم وتم استقبالنا بشكل جداً لائق .. والترحيب جميل والخدمة رائعة و توفقّنا لأن “كوكو” كان المسؤول عن طاولتنا .. نصحنا بأطباق جداً لذيذة وهي سلطة بالجرجير ولحم البط .. كانت خيال .. وكمان نصحنا بطبق مقبلات عبارة عن تشكيلة من دمبلنغز بالجمبري وبالخضراوات وبالكافيار وكثير من المكونات اللي كانت بلا مبالغة رائعة ومعاها الصوص الصيني الحامض حلو والحار .. والصويا صوص ..

ونوعنّا في الطلبات لأن المنيو في المطعم متنوع  وكانت طلباتنا جمبري حار و سمك سلطان إبراهيم مشوي و لحم ريب-آي بالصوص الاسود والبصل والثوم .. الأطباق كلها لذيذة .. وطلبنا أطباق جانبية وهي الرز بالخضروات والرز بالمأكولات البحرية اللي طعمها لذيذ وشهي.

وختمنا هالوجبة الرائعة بآيسكريم هوم ميدي بثلاث نكهات .. ولا يقل روعة عن أي طبق من الاطباق اللي طلبناها .. ولا أنسى إن العصير اللي طلبته مرة يجنن وكان عبارة عن كيوي ونعناع وبعض المكونات الخضراء.

وكل هذا المذاق الطيّب كان في أجواء رايقة من الديكورات الخشبية محفوره بالستايل الصيني وإضاءة خفيفة مريحة .. قضينا أمسية رائعة .. وإن شاء الله بكررها وأنصح أي شخص ما قد جرّب مطعم هاكاسان إنه يروح ويجرّبه ويقضي وقت رائع ولذيذ ..

وطبعا من المعروف عن مطعم هاكاسان إنه أول مطعم صيني يحصل على نجمة ميشلان من دليل ميشلان للذواقة.

وبإختصار القول .. اللي ما أكل في مطعم هاكسان الصيني .. يعتبر نفسه ما أكل .. !

www.hakkasan.com