تغدينا قبل كم يوم غداء جميل في مطعم “انتوريوم – Anthurium” اللي في شارع عبدالله بن حمدان السليمان تقاطع التحلية ..

أنا قبل كذا جيته أكثر من مره ولكن لأن بعد ما بديت التدوين صرت أشوف الشي وأتمقل فيه عشان أنقل لزوار المدونة أدق التفاصيل.
نبدأ بالديكور بديكورات المطعم اللي تميل إنها تكون عصرية وألوان هادية وجذابة يعني كنها لوبي فندق.
المهم انهم استقبلونا استقبال حلو اجتهدوا وعطونا طاوله على فيو .. هو الفيو يمش حاله لأنه على باركنق السيارات 🙂
وعطونا مناديل معطرة يعني دلعونا وبعدها عطونا المينيو عشان نختار وش بيجوز لنا من الأطباق.. !
وبدا السيرفيس بأنهم جابوا صحن فيه عدة نكهات للزبدة واللبنة وسلة خبز فيها أنوع متنوعة من الخبز .
فتحت المنيو وطلبت دجاج بالمشروم وأبشركم جا الدجاج وكان لذيذ مره ولو إنه مره ثقيل وكميته كثيره  وقالي تبغين فلفل اسود وقلت له إي بالله حط لي شويه ..
وصحبتي كمان طلبوا أطباق وقالوا عنها إنها لذيذة وهي باذنجان .. و ماكي شريم و سلمون بالماش بتيتو  وبعدين تقهوينا بس ما قدرنا نحلي بسبب أنو الكمية مرة كبيرة
والقعدة تجنن والأكل روعة والكمية راهية يعني اللي مره جوعان يروح لأنهم متوصين في الكمية..
بس العيب الوحيد هو أنهم مره زادوا في الأسعار بدرجة مبالغ فيها يعني بزيادة مره مره مره
وأترككم الحين مع الصور :