البارحة رحت أجرب الإفطار الرمضاني اللي في فندق الريتز-كارلتون دبي في منطقة مرسى دبي – الـ JBR، هذي السنة هم عاملين قاعة واسعة مخصوصة فقط للإفطار من دخلت للفندق الهادي الجميل لقيت إن القاعة لا تقل جمال وهدوء عن المدخل يعني من البداية ننتقل للأجواء الرمضانية الجميلة اللي تبان في الديكورات الشرقية في كل ركن من أركان المكان بهدف خلق اللأجواء الرمضانية الرومانسية اللي نستمتع فيه في هذا الشهر الفضيل.

تتنوع الجلسات في القاعة بين طاولات وبين جلسات بكنب وكلها معدة سابقاً بوجود التمر والماء بالإضافة إلى تقديم القهوة العربية عند الأذان اللي قام مؤذن برفعة في المكان مع تدخين المكان بالدخون الشرقية اللي بالفعل لها وقع أثر فينا لأننا عشنا تجربة حقيقية للإفطار الرمضاني.

ويمتاز بوفيه الريتز-كارلتون الرمضاني بتنوعة الكبير وبمذاقه الرائع حيث إنه يضم المقبلات والسلطات والمعجنات والشوربة وأنواع مختلفة من السنبوسة والخبز والأطباق الرئيسية والأوزي والسمك والشاورما والحلويات الشرقية والغربية والآيسكريم والمشروبات والعصائر واللبن وأهم شي هو الركن الخاص بالكسكي المغاربي .. طعمه مره عجيب .. بالإضافة إلى إني أعشق هذي الاكلة الرائعة .

الخدمة أكثر من ممتازة مع الأجواء اللطيفة من عزف شرقي على العود بعد الإفطار وكمان تتوفر شاشات تلفزيونية للراغبين في متابعتها ومصلى للنساء وآخر  للرجال قبال القاعة، ولا أنسى الصقر اللي أستقبلنا قبل دخولنا القاعة .. أجواء عربية لطيفة و أمسية شرقية جميلة قضيناها في الريتز كارلتون الفندق الجميل اللي سكنته أول ما فتح في صيف 2000.

وتفرجوا على الصور  اللي أخذتها للمكان وأحكمو بأنفسكم: