تغطية المطاعم

مطعم ( توم وسيرج Tom & Serg ) خوووش مكان وخوووش أكل

هاليومين طيّحت في مطعم وكافيه اسمه ( Tom & Serg )، المكان مره حلو .. الطابع حقة يجنن والأكل مرة لذيذ والقهوة ما حصلت.

والمطعم هذا تأسس هالسنة 2013 على يد توم أرنيل من استراليا وسيرجيو لوبيز من أسبانيا، واللي فهمته من البايو في موقعهم إن توم هو اللي يطبخ وسيرجيو وهو اللي ياكل : )

ويوصفون اللي يقومون فيه إن هم يبون يرضون ذائقة الناس الذواقة لأنها الأكل اللي يقدمونه يتكون من مكونات جيدة وطازجة، الله حق أكلت في المطعم الأكل لذيذ .. ومعلومة بسيطة فيه إتجاه لمطاعم في دبي إنها ما تقدم المشروبات الغازية مثل الكوكا كولا والبيبسي عشان كذا إضطريت إن أشرب موية غازية مع البرجر !

بس اللي يقهر في الموضوع إنهم بس يفتحون من الساعة 8 الصبح ولين الساعة 4 العصر : ( حسافه والله ..

و الحلو في المكان إنه كبير و واسع ويتكون من طابقين يعني متوفرة الطاولات رغم الزحمة دايم .. وكمان توجد منصة علوية مثل البار تطل على الأسفل ممكن إستخدامها للأشخاص اللي يجيبون لابتوباتهم ويحبون يشتغلون في القهاوي مثلي مثلا : )

والجميل في دبي إن صاير فيها أمكان كثيرة تقدم أكل حلو ويهتمون إن تكون الديكورات جذابة و جميلة والأجواء مريحة، أنا شخصيا أستمتع في هذي الأماكن أكثر من الفرنشايز.

موقع المطعم في القوز عند شارع الشيخ زايد و شارع المنارة يعني لو دخلنا من مدخل اللي يودي للتايم سكوير سنتر .. نمشي على طول إلين مايقفل شارع الخدمة ويجبرنا نلف يمين .. نلاقي ( Tom & Serg ) على يدنا اليمين.

الوسوم

مقالات ذات صلة