تغطية المطاعم

لحوم ولا أروع في مطعم ”ميت أند كو Meat & Co “ في مدينة جميرا

قبل كم يوم .. وبالتحديد في اليوم اللي نشرت صورة في حسابي على الإنستغرام وكتبت لمحة عن الستيك اللي طلبته في مطعم “ذا ميت كو The Meat Co“، في مدينة جميرا بدبي، وهذا المطعم مشهور جداً وكثير مننا يعرفه لأنه يقدم لحوم جيده جداً لا بل هي لحوم ممتازه.

المطعم في موقع استراتيجي في مدينة جميرا يطل إطلالة مباشرة على برج العرب مع مناظر من أروع ما يمكن لمدينة جميرا بطابعها الشرقي القديم مع الجداول المائية ومرور الجندول أو العبرة اللي يعتبر الاسم المتداول بدبي.

ديكور المطعم من الداخل عصري ويتميز باللون الخشبي مع بعض اللمسات الزجاجية الجميلة، أما الشرفة الخارجية فهي حكاية لأن نصفها عبارة عن منصة خشبية في وسط البحيرة المائية.

الجو الحين بدأ في دبي يصير جميل والاستمتاع في الجلوس بالهواء الطلق في هذي الأيام بالتأكيد حق مشروع : )

قائمة الطعام تضم كثير من الأصناف من مقبلات وسلطات وأطباق رئيسية وحلويات، في البداية طلبت سلطة الروكا وصحبتي طلبت الربيان بالصلصة الحارة وكانت شهية أما اللي كان هو نجم الحفل على ما يقولون هو طبق الشاتو برياند وهو طبق يقدم لشخصين وحنا تشاركنا فيه وهو عبارة عن ستيك من لحم الخاصرة لبقرة تغذت لمدة 150 يوم على الحبوب ويتم شواءها لين ما تنضج وأقترح علينا الجرسون إن يكون ميديوم ويل يعني نص سواء، بس أصرينا يكون ويلدون مستوى جداً، لأني أفضّل اللحوم المستوية ومع الطبق كان فيه بطاطا سوتيه وهيليون ومشروم وثلاثة أنوع من الصوصات هي الفلفل الأسود والفطر والماسترد بالزبدة .. كلها شهية جدا والطبق أكثر من رائع .. ويعتبر من ألذ الستيكات اللي ذقتها في دبي.

ولكن وبكل أسف ما كان فيه مساحة إني أجرب الحلا لأن الكمية ما شاء الله مره كبيرة ..

من جد اللي في دبي لازم يجرب هذا المطعم لأنه مميز في كل شي سواء الجلسة أو الخدمة وبالتأكيد الطعم اللذيذ والشهي.

أترككم مع الصور اللي خذيتها في زيارتي للمطعم:

The-Meat-Co-2 The-Meat-Co-3 The-Meat-Co-4 The-Meat-Co-5 The-Meat-Co-6 The-Meat-Co-7 The-Meat-Co-8 The-Meat-Co-9 The-Meat-Co-10 The-Meat-Co-11 The-Meat-Co-12 The-Meat-Co-13 The-Meat-Co-14

 

الوسوم

مقالات ذات صلة