البارح رحنا تعشينا في مطعم جديد اسمه شاورما سويتش “S’wich” اللي توه فاتح في مرسى دبي، المكان مرة جميل من حيث الديكور .. بس شكلهم معتمدين على التوصيل لأن مرة كثير الدراجات النارية اللي واقفة قدام المطعم وكمان لأنه مره صغير و ما فيه إلا طاولتين صغار بـ 4 كراسي صغار بدون ظهر يعني كنها طريقة الأماكن اللي الأكل في العربات أو مطبخ الشارع “Street Kitchen”، المكان ديكوره عصري وجميل ومرتب، وتبون الصدق السبب الرئيسي اللي خلاني أجرّب شاورمتهم إن قايلين إنها شاورما غورميه ومبتكرة وفيه لحم البط ولحم العجل والمشروم وإن الشيف المشهور إيزو آني هو اللي حط القائمة.

يوم نروح البارح كانا مجموعة مكونة من 4 أشخاص وطلبت أنا وصديقتي شاورما دجاج وبطاطس والثنتين اللي معانا كانوا قد نصحونا قبل لا ندخل المطعم قالوا ترانا محنا طالبين ! قلنا لهم ليش قالوا : حنا قد جربناة توصيل للمنزل ومرة تعبنا من الثوم وجتنا حرقة المعدة وما قدرنا ننام.

المهم إننا ما سمعنا النصيحة و ودخلنا وطلبنا .. في البداية طريقة تقديم الشاورما كويسة وكمان طعم الشاورما لا باس وإن كان الثوم كثير يعني ممكن نقول ثوم بالشاورما مش شاورما بالثوم ! والصوص كنه سايل مش متماسك .. أو كأن الماينيز مكثيرنه مع الليمون .. المهم إن الطعم في البداية ما يشكي من شي .. ولكن ما مرّت ساعتين .. وكنا افترقنا .. إلا صاحبتي ارسلت لي واتساب قالت لي هلااااا حرام عليك .. بموت من الحارق ( حرقة المعدة )، وحنا نسميها في الرياض حموضة ! والمصيبة إني أنا كمان ما قدرت أنام من حرقة المعدة .. شبت على معدتي .. شي مو طبيعي ؟ لأننا أربعة أشخاص وكلنا عانينا من نفس السبب  ونفس المشكلة وهي حموضة المعدة والحرقان ! .. معناها إن الخلطة فيها شي .. يعني ما هي متركبه صح. أوكي هم طوروا في الشاورما بس النتائج عكسية .. لأن أنا شخصياً ما راح أغامر مرة ثانية وأطلب هذي الشاورما والصوص ثقيل بهذا الشكل .. إن شاء الله ينتبهون القائمين على مطعم  سويتش “S’wich للمشكلة ويراجعون حساباتهم .. لأن المطعم مش ديكور وخدمة واللي هو متوفر بشكل جيد في سويتش “S’wich” .. بس لين جينا للصدق أهم شي الأكل نفسه اللي هو السبب الرئيسي في إختيارنا للمكان اللي نروح له

switch-shawarma2