الأسبوع الماضي رحت جربت مطعم “ذا ستيك بار The Steak Bar” اللي توه فاتح في ذا بيتش (JBR)، وهذا هو الفرع الثاني لأن الفرع الأول في مركز دبي المالي العالمي (DIFC).

بصراحة اللي خلانا نقعد في المطعم الصور اللي حاطينا على الطاولات .. عذاب ! توفقوا صراحة  .. نجي للمطعم اللي ستايله من الداخل عبارة عن بار أو منصة جلوس بكراسي مرتفعة و كمان فيه جلسة خارجية بكراسي جذابة وتطل على شارع الممشى ومنطقة ذا بيتش مادحة نفسها لأنها الآن من أجمل الأماكن في دبي، الجو كان لطيف عشان كذا فضلنّا الجلوس بالخارج، عطتنا الجرسونه المنيو اللي هو عبارة عن أنواع مختلفة من اللحم وبرجر مع بعض الأطباق الجانية والبطاطس أكيد ..

أنا طلبت لحم فيليه لأني ما أحب اللحم اللي يكون فيه شحم والفيلية دايم يكون خالي من الشحوم، وطريقتهم في المطعم بالغرام وكان طلبي 100 غرام بسعر  80 درهم  وصديقتي طلبت TSB برجر وعجبها تقول عنه زين، طريقة تقديم الأطباق جميلة جداً وجذابة للغاية وشوفوا الصور وأحكموا ..

أنا حسيت إن لحمة الفيلية اللي جابوها ليي قاسية شوي، يمكن لأني طلبتها مستوية ! مع إن في مطاعم ثانية أطلبها مستوية بس تجيني أطرى شوي.. ويمكن لأنهم في “ذا ستيك بار” يقطعونها في لحظتها وما تتبل إلا في وقتها يعني مو مثل اللي تكون منقعّه فترة طويلة و هذا اللي في الغالب اللي يخليها طرية.

والشي الثاني اللي ما كان في الحسبان ! إن يوم طلبنا الفاتور لقيت إن طلبي مش 80 درهم .. لقيت إنه محسوب 92 درهم .. وبصراحة أنا لا استفسرت ولا حاجه لأن لقيت مكتوب في الفاتورة إن وزن اللحمة 112 غرام يعني فيه زيادة 12 غرام زيادة وعشان كذا زاد السعر .. بس في رأيي أن المفروض الغرسونه يوم إنها أخذت منى الطلب كان قالت لي إن لو زاد عدد الغرامات بيزيد السعر والعكس صحيح .. بس هي ما نوّهت لهالشي أبد .. طيب فرضاً لو أنا كنت عامله حسابي وكان معاي بس 80 درهم ! .. وش بيكون موقفي وقتها ؟

ذيك الساعة بضطر إني أتفاوض وأتكلم وأتفاهم في اللبس اللي حصل .. بصراحة هذي النقطة مره ما عجبتي ياليت لو يقولون أو ينبهون على الغراسين إنهم يعلّمون الزباين قبل ما أحد يتوهق.

بس التجربة ككل التجربة لا بأس فيها واللحمة طازه .. واللي حبون اللحوم الطازه أكيد بيعجبهم .. أما أنا أحب اللحوم المتبلة أكثر ووأحبها ناقعة لأني أحبها تصير طرية.

ونسيت أقول كمان صورة الحلو اللي في المطعم شكله رهيب بس ما كان باقي مكان في البطن .. تخبرون الستيك ثقيل رغم إن الكمية قليلة بس مع البطاطس كبست .. بس إن شاء الله مرة ثانية نروح بس نجرب الحلا  مع قهوة : )