بالنسبة لي أنا .. أعتبر مدينة ” لندن ” منجم للي يبغى يتسوق لأنه بيلاقي كل شي .. وبيلاقي أشياء مرة جميلة وخصوصا للي ينشدون الشي الغير واللي مو الدارج. لأن مدينة لندن زاخرة بكل أنواع المتاجر والمحلات والبوتيكات و أماكن التسوق الجميلة وخصوصاً اللي ينشد التميز فمدينة لندن هي بالتأكيد هي المقصد.

ومن خلال خبرتي في مدينة لندن بأكتب لكم عن كل الأماكن الجميلة والمميزة والتسوق الفاخر والفنتج وكل ما لفت نظري في مدينة لندن.

يعني راح أفنّد لكم شوية أماكن و شوية شوارع للتسوق الفاخر وكمان للتسوق اللي شيك وأسعاره زينه وهذا كله عن تجربة شخصية بحكم زياراتي لهذي المدينة ” لندن ” اللي أحبها كثير واللي من فتحت عيوني على الدنيا وأنا أروح لها..

أنا أشوف أن من أهم مناطق التسوق في لندن هي منطقة نايتسبردج واللي فيها الكثير من الأماكن و لأن فيها متجر ” هارودز ” الغني عن التعريف وكمان متجر ” هارفي نيكلز ” والمنطقة كمان تضم ” سيلون ستريت ” اللي يشتهر بإحتواءه على كثير من المتاجر الفاخرة وسيلون سكوير و ” كينكز رود ” اللي يعتبر من ضمن منطقة تشيلسي اللي فيها بوتيكات ومحلات مميزة وكمان فيه ” بيتر جونز ” وهو متجر متعدد الطوابق والمنطقة اللي تستهويني وتعجبني هي منطقة سيلون أفينيو رايقه وفيها محلات حلوه وطبعا ولا ننسى أن منطقة نايتسبرج جنبها منطقة كينزنغتون اللي فيها ” هاوس أوف فريجر ” وفيها محلات مميزة جداً وفيه داعوس فيه أشياء فنتج يعني أماكن تستحق الزيارة.

نجي عاد لمنطقة في شرق حديقة الهايد بارك واللي فيها الشارع التسوق الشهير ” أكسفورد ستريت ” اللي فيه متاجر كثيرة متعددة الطوابق منها ” سيلفريدجز ” ووراه شارع صغير اسمه ” جيمس ستريت ”  كله مطاعم وبوتيكات و ” جون لويس ” و” توب شوب ” والمنطقة فيها شوارع متفرعة وفيها أسواق ومنها شارع نيو بوند ستريت اللي فيه متجر ” فينك ” و أولد بوند ستريت وكمان فيه شارع ” سولث مولتون ستريت ” وهو للمشاة فقط وفيه ” بوتيك براون ” الشهير و شارع ” بروك ستريت ” وشارع ” سيفل رو ” اللي يشتهر ببوتيكات البدلات الرجالية. وكمان فيه دوفر ستريت ماركت اللي يوسع الصدر وهو متجر يتكون من طوابق عديدة ويضم ماركات عالمية رائعة، وهو يقع في منطقة مايفير اللي فيها شوارع كثيرة فرعية وفيها متاجر وبوتيكات مميزة عن جد.

وفي المنطقه فيه شارع ” ريجنت ستريت ” اللي فيه متجري المفضل ” ليبيرتي ” وكمان متجر ” هامليز ” الشهير للألعاب ومتجر ” أبل ” طابقين في هالشارع وخلف ليبرتي فيه الشارع العجيب ” كارنبي ستريت ” اللي يعتبر من أشهر شوارع التسوق في بريطانيا وهو فقط للمشاة وفيها بوتيكات ومحلات حلوه وفيه كمان مجمع كنه بطن حوي اسمه ” كينغلي كورت ” .. وجنبه شارع ”  بيكاديللي ستريت ” فيه متاجر مميزة جداً و يتواجد فيه ” فورتمن أند ميسون ” الشهير واللي يعجبني مره وما أتخيل أروح لندن ما أمر عليه.

وطبعا التمشية في منطقة ” كوفنت جاردن ” الترفيهية الممتعة واللي نقدر نروح لها عن طريق ليستر سكوير .. نبتل شوي نلاقي كوفنت جاردن في وجهنا واللي كل يوم فيها سوق للباعة اللي ما عندهم محلات ولكن يعرضون منتجاتهم في هذي المنطقة، مرة للفنانين ومره للفنتج ومره للتحف والأنتيكات ومره للأعمال اليدوية .. وبالمنطقة هذي فيه شارع اسمه “نيل ستريت” و شارع ” فلورال ستريت ” اللي فيهم بوتيكات ومحلات مره حلو.

ولندن فيها أسواق مرة كثيرة وفيها شوارع مليانه بالمتاجر والبوتيكات .. يعني لو نتمشى ممكن بالصدفة نطيح على شي مرة يجنن .. وفيه” بكستر فيلج  “(قرية البضائع المخفضة) وهي خارج لندن تبعد حوالي ساعة بالقطار.

وطبعا فيه أسواق شعبية مثل سوق بورتوبيلو .. هذا في منطقة نوتينغ هيل وفيه بوتيكات لأشياء مستنكره وأثاث قديم .. بس أنا ما قد رحت له إلا مره وحده فقط! وكمان في أسواق أنا ما رحت لها بس سمعت عنها مثل سوق ” شيبردز بوش ” و ” فولهان ” و ” كامدن “.

بالنسبة لي لندن مدينة الأسواق بلامنازع لانها زاخره بالمتاجر والمحلات والبوتيكات المميزة واللي تقدم كل جديد في عالم الموضة واللايف ستايل.

وطبعا ولا يهونون باقي المدن والعواصم اللي فيها أماكن مميزة للتسوق الفاخر ومنها:

– شارع سانت أونوريه – باريس
– فيا كوندوتي – روما
– فيا مونتي نابليوني – ميلانو
– جراند فيا – مدريد
– فيفث افنيو – نيويورك
– روديو درايف – لوس أنجليس
– بينزا – طوكيو
– منطقة سنترال ، وكمان الهاربر في كولون – هونغ كونغ
– منطقة نيشانتشي وكمان شارع بغداد في اسطنبول
– دبي مول ومول الإمارات – دبي

كتبت هذا الموضوع عشان يكون مرجع لكل شخص وده يعرف عن أسواق لندن قبل لا يروح لها .. يعني يكون عنده فكرة لو شوي ..

وياليت لو فيه أماكن تعرفون عنها في لندن ما ذكرتها تكتبونها في التعليق .. عشان الكل يستفيد ..