بعد إنقطاع عدت لكم حبايبي وأصدقائي أصدقاء مدونة وين أنا؟ بسبب الإجازة واللي تعتبر قصيرة وهي عبارة عن أسبوعين ولكن يالله لك الحمد والشكر .. أسبوعين أحس إنها وافيه وكافية.

والرحلة كانت لمدينة اسطنبول وكانت فيه أسباب كثيرة دفعتنا لأن تكون اسطنبول هي وجهتنا .. وهي المدينة اللي رحت لها في سبتمبر الماضي ولكن كانت رحلة قصيرة جدا 5 أيام حسيت إني ما شفت شي وكمان طايره بوهتي ومن كثر ما قالوا الناس اسطنبول .. اسطنبول جتني غلقه حسيت إني بشوف شي ما قد شفته وأظن إني كتبت موضوع ذاك الوقت وقلت اللي قلته ..

بس الحين يوم عطيت الديرة فرصة ثانية ورحت لها وتمقلت فيها وفطنت على أشياء ما شفتها في المرة الأولى بس شفتها في هالمرة .. حسيت الحين إنها مدينة ساحرة بكل ما تحوي هذي الكلمة من معنى .. اسطنبول مدينة جميله و فيها كل شي .. ولين قلت كل شي وأنا صادقه فيها كل شي .. الله أعطى هالمدينة الجمال والسحر.

ورغم الجمال والسحر إلا إن فيه شوي ملاحظات وهي مهمة أول شي إنها بالصيف شويه زحمة وكمان الجو يكون يميل إنه يكون حر شوي .. وخصوصاً إننا نتمشى تحت الشموس.. زائد إن ممكن تنعمى عيونكم من روائح الأجسام  اللي لا تطاق ومره كريهه .. هذي الشي مره يغث ..

وكمان إذا استأجرتو سيارة لازم تكونون حريصين يعني لو طلعتوا برا اسطنبول لازم تتاكدون من السواق إذا كان فيه تكلفة إضافية أو لا! لأن السواق ما يقول لو ما سالتوه .. مثل ما صار لنا طلعنا يوم لسفانجا وعطانا دبل السعر مع إنها ما تبعد كثير عن اسطنبول وكمان سرينا قبل كل يوم نسري فيه في الأيام العادية .. بس هي غلطتنا إننا ما سألناه وكمان هو غلطان اللي ما عطانا فكره إن السعر يكون دبل.

والمهم إن المطاعم اللي يرشحها و يقترحها لكم السواق أو وكالة السفر اللي موفرة لكم السيارة أسعارها أغلى بكثير من أي مطعم تروحون له عن طريق بحثكم بالإنترنت عن أفضل مافي اسطنبول ..

وكمان من أجل الإحتياط في حال عدم إستئجار سيارة واستخدمتوا تاكسي .. دايم خذوا رقم التاكسي قبل لا تركبون وترسلونه “واتساب” أو “إس إم إس” لأي أحد تثقون فيه و يكون مو معاكم في الرحلة .. سبحان الله ، وكمان لو عندكم أجهزة جوال ذكية ممكن تشتركون بالإنترنت أول ما توصلون وعلى طول تستخدمون خرائط جوجل والنافيغيشن فيها وتكتبون المكان اللي بتروحون له وراح يعمل لكم سير خط الرحلة يعني التاكسي لو عكس الخط ذيك الساعة إدروا إن الوضع ممكن يكون مو تمام وعندها ممكن تبثرونه.

هذي بعض النصايح المهمة اللي لازم نتبعها في السفر وأهمها الأذكار اللي مو بس في السفر 🙂 ..