وحنا نتمشى البارح في دبي مارينا من ناحية دبي مارينا مول وكانت الساعة تقريبا خمسة إلا ثلث ومرينا جنب محطة دبي فيري وهي مركب متوسط الحجم يآخذنا في رحلة لمدة ساعة من دبي مارينا إلى نهاية النخلة ويعوّد بنا.

أسعار التذاكر 50 درهم للفضية و75 درهم للذهبية .. الفرق أنو الذهبية كراسي جلد ووسيعة وفي مقدمة المركي ولكن المقدمة غير مكشوفة يعني بس من الجنب الشباك..

وكمان لأن من تبدأ الرحلة لين ماتنتهي وحنا في الحوش في آخر المركب وما راح نستفيد من القعده في المقدمه .. شرينا تذاكر فضية وقلنا عن الخساير 🙂

ومثل ما تخبرون المواصلات في دبي على مستوى رفيع جداً، نظافة ومواعيد منتظمة وآليات على أحدث طراز وفي كل درجاتها يعني ذهبية فضية كلها على نفس القدر من الرعاية.

جت الساعة 5 وإنطلقنا وكانت في المارينا السرعة بشويش عشان السرعة متحددة في خور المارينا وبعدين يوم طلعنا منه إنطلقنا.

الجو كان في البحر رائع جداً وصافي وشكل وجو المارينا يرد الروح .. يوم طلعنا صرنا نشوف فنادق هلال النخلة من برا ولفت نظري فندق جديد قاعدين يبنونه شكله مثل صنعاء القديمة واسمه “مملكة  سبأ – Kingdom of Sheba” وهو استثمار للشركة الكويتية إيفا للفنادق والمنتجعات.

وبعدين مرينا على أتلانتس ويوم وصلنا لنهاية النخلة عودنّا ودخلنا للمارينا من المدخل الثاني مش من اللي طلعنا منه وفيه العماير الشاهقة اللي تطل على البحر.

رحلة ممتعة وأنصح بتجربتها ..