كثير مننا يكرّر السفر للأماكن اللي يعرفها .. والسبب يمكن يكون خوف من الأماكن الجديدة، أو المجهول اللي ما يعرف وش ممكن يصادفه في هذي الأماكن، والبعض الآخر ممكن تكون عنده المسألة هي تعود على المكان أولاً وأخيرا وبكذا ما يفضل التغيير!

والبعض يشوف إن في السفر راحة عشان كذا يختار الأماكن اللي فيها منتجعات ساحلية أو جبلية.

السفر في الزمن الحالي اختلف بشكل كبير عن الماضي .. طبعاً الأجانب من يوم يومهم هذي طريقة سفرهم بس حنا لين الحين الناس تسافر لمدن معينة ولا تحب تروح غيرها.

أما اللي يبغون التغيير مثل ما أنا افكر حالياً .. فهم يفكرون في استكشاف أماكن جديدة لكسر الملل والروتين والتعرف على حضارات الآخرين أو مشاهدة الطبيعية وظواهرها والإنطلاق في هذا العالم بدون قيود يعني ممكن يكون السفر فقط بحقيبة واحدة على الظهر والتنقل بكل حرية في المواصلات العامة كالقطارات والحافلات.

سفر يفتح الآفاق بشكل أوسع .. وكل مرة تكون لمدينة مختلفة بالشكل والنكهة وكل حاجة ..

أنا مع التكرار لبعض المدن اللي ممكن أي شخص يكون له حنين، أنا مثلا عندي دايم حنين لسويسرا .. وأتوقع الحنين هذا مرتبط بالطفولة .. يعني الأماكن اللي يروح لها الشخص وهو صغير دائما ما يشعر بالحنين الدايم لها.

و بغضّ النظر عن الحنين فيه أماكن تتكرر لأنها حلوة مثل العواصم الكبرى اللي فيها كل شي تقريباً.

والحين أنا ودي أسافر سفرة مثل هذي اللي أتكلم عنها حقيبة واحدة على الظهر والتنقل بين المدن بالقطارات والحافلات وغالياً هذ السفر بتكون في أوروبا لأنها تتمتع بشبكة قطارات كويسة.