تغطية المطاعمسفر

رحلتي إلى عجمان .. وتجربتي لمطعم المأكولات البحرية ( صافي ) في فندق عجمان سراي

يعتبر فندق “عجمان سراي” المطل على البحر من الفنادق الجديدة مرة في عجمان ماله شهرين تقريباً وهو تابع لـ ” ذا لكشري كولكشن (The Luxury Collection) التابعة لشركة ستاروود للفنادق والمنتجعات، وأنا رحت عشان أجرّب مطعم “سافي Safi” اللي مختص بالمأكولات البحرية، في البداية أحب أعرف شوي عن عجمان وهي إحدى الإمارات العربية المتحدة وأصغرها تقريباً.

إمارة عجمان تطل على الخليج العربي وهي بين الشارقة وبين أم القوين وتبعد من دبي تقريباً 45 دقيقة إلى ساعة أو أكثر حسب الزحمة.

واللي يميّز الفندق تصميمه الشرقي والعربي بشكل أنيق، ويعتبر الفندق صغير إلى حد ما لأن فيه تقريباُ 200 غرفة وجناح وكلها مجهزة بأحدث التجهيزات، وكمان يتوفر في الفندق 5 مطاعم وهي : مطعم مجهانا اللي يقدم المأكولات الشرق أوسطية،  ومطعم فيستا وهو المطعم الرئيسي في الفندق، ومطعم باب البحار، ولاونج الشرفة، ولاونج إسكيب، ومطعم صافي اللي يقدم المأكولات البحرية وهذا هو المطعم اللي جربته خلال زيارتي للمنتجع.

ديكور مطعم صافي حديث وعصري ويوجد فيه منصة لعرض الأسماك وثمار البحر لإتاحة الفرصة لنا لإختيار السمكة اللي نقع في حبها من أول نظرة : )

والمطبخ مكشوف بحيث نقدر نشوف طريقة طهي الطعام والطهاة وقت ما يعدون الأطباق وشفنا رئيس الطهاة وهو يعد لنا سمك محلي صيد اليوم وبطريقة جداً سهلة 5 دقايق والطبق جهز بس عاد لو فكرّنا حنا نسويه بالطريقة اللي سواها ما أظن تزبط معنا 🙂

واللي يميّز مطعم صافي إنهم يقدمون الأسماك بأكثر من طريقة يعني بالطريقة الأوروبية وتحديداً الفرنسية لان رئيس الطهاة من فرنسا وكمان بالطريقة الاسيوية وتحديداً التايلندية بالإضافة إلى الطريقة التقليدية في الشواء.

واللي عاد كان فن فن فن .. الحلويات اللي من جد رهيبة بصراحة المطعم جداً رائع والجلسة هادية والخدمة جميلة والمذاق شهي والمكان مريح والإطلالة على البحر حلوه.

المنتجع ككل جميل وهادئ ويحث على الإسترخاء .. أنصح اللي بتكون له زياره لعجمان إنه يسكن في الفندق أو يجرب مطعم صافي الجميل.

شكشكت لكم صور للمطعم والأطباق والطهاة والفندق من الداخل والخارج، ما بقيت شي حتى صالة المؤتمرات والأفراح دخلتها وصورتها يعني عشان يكون كل شي على نظركم .. وأنتم أحكموا والصورة خير برهان.

الوسوم

مقالات ذات صلة