من 4 سنين وشوي والحمد لله وحنا متوفقين مع هالبلاك بيري اللي سهل علينا الإتصال والتراسل ووفر علينا مره.
لكن لكل شي فيه آثار جانبية يعني برضوا من أربع سنين وشوي وحنا في معمعة البرود كاست من بدا البلاك بيري بالإنتشار وكل انسان يستقبل من 30 إلى 50 برودكاست في اليوم، وهذا المعدل الطبيعي ! لأن فيه ناس يتعدون الـ 100 وأكثر .. وهذولا يندرجون تحت بند إدمان التراسل الفوري على البلاك بيري .. كل حجتهم إنه التراسل ببلاش .. هو ماهو ببيلاش هو اشتراك بالشهر ..
ماعلينا من هذا كله .. اللي لنا فيه أنو من أول كنا نعاني من قلة الوعي وقلة الثقافة , وكنت دايم أقول حنا شعوب متعلمة نعم .. مثقفة لا .. ولا ني بحاكيه عن غرور الطبقة المثقفة وبعدهم عن باقي البشر وتعاليهم على الناس اللي أقل منهم ثقافة ولا عن شخصنة المواقف ولا عن التنظير في البروج العاجية .. هذا كله ماهو محور كلامي .. أنا أتكلم عن جيل جديد قاعد يكبر على ثقافة البرودكاستات .. يعني جيل قاعد يتجرع سم وهو مش عارف .. لأنه يستقصي الثقافة والمعلومة عن طريق البرودكاست .. وهذا الأمر جداً مخيف والفكر بيتسطح ، هذا إذا ما صار مستعصي عليه في المستقبل القراءة العادية اللي كلنا يوم كنا صغار كنا نمارسها كهواية تغذي أفكارنا بإختيارنا للكتب اللي تستهوينا .. لكن الحين البرودكاستات تقتحم روسنا بالأفكار الموجهه من ناس مجهولة ما ينعرف وش الغرض أو الهدف من بث بعض الأفكار.

البعض يشن حملات لأغراض شخصية والبعض مثيرين للإشاعات اللي ممكن إنها تهدد سلامة المجتمع وهذا برضو شي خطير..

للمعلومية أنا أحذف الكلام اللي يظهر باللون البنفسجي من غير ما أشوف إلا من بعض الاشخاص اللي أشهد لهم إنهم ما يرسلون إلا الشي اللي فعلا يستحق إن الناس تتداوله ويتم نشره !