اللي قاعد يحصل في تويتر كثير .. بصراحة الوضع صار لا يطاق والناس مو طايقه بعض .. التحريض والإندفاع والفوضى والناس منقاده ورى هالهاشتاق .. الناس تجري وراه مثل القطيع و ممكن إنه يقضي على أي إنسان غافل .. وهو ما يدري وش السالفه على قولة المثل : ” تجيك التهايم وإنت نايم ” !

بين كل فترة وفترة يشبّون في فئة من الناس أمور كثيرة والحين تم التصعيد على بعض الناس في تويتر والقضايا صارت ما تتناقش بالعقل قدر ما صار الصوت العالي والغوغاء هي السمة ..

ياناس المفروض في تويتر الناس تكون حريصة على كل كلمة تكتبها سواء مع أو ضد .. تتفق أو ترفض .. زائد إننا لا نغفل نقطة إن ممكن أي شخص تكون له عداوه مع شخص آخر ويبغى يصفي حسابات معه يعني مع الشخص اللي يكرهه ..يقوم يفتح حساب في تويتر تحت اسم الشخص المراد مرمطته ويتكلم كلام لا يعقل  .. والناس تهوج عليه وتتهمه بكل التهم ويطالبون بالتنكيل فيه ..

يعني الكل لازم يتنبه من هالشي ممكن إن الناس تنتحل الشخصية وتصير مصايب من ورى بعض الحسابات الوهمية في تويتر اللي تضيّع ناس أبرياء ..

أنا ما أبرأ أحد ولا أتهم أحد بس أنا أحذر من هالتويتر إننا لازم نحذر .. تويتر هذا صاير يخوّف لأن صار كنه سيف على رقاب الناس أو سهم ممكن يصيب في مقتل للاسف تويتر صار كنه ساحة قتال مو موقع تدوين مصغّر أو تواصل إجتماعي !

والله إني منصحة .. لأن الوضع صار مرعب من جد واللهم أحفظنا يارب من شر تويتر اللي إنتشر .. قولوا آمين