من زمان ما كتبت في المدونة .. أدري؛ والله مقصرة بس تخبرون دوامة السوشال ميدينا اللي مش فايقين منها، تخبرون سناب شات وانستقرام وتوثيق تفاصيل يومنا عليها وهذا برأيي أكبر غلط ولكني إن شاء الله بحاول التصحيح.

المهم .. تجيكم السالفة .. قاعدة أفكر كيف إن تقريبا كل عاداتنا اليومية وطريقتنا ونظرتنا للحياة تغيرت في فترة بسيطة يعني جيل الطيبين يقدرون يعرفون هذا الشي اللي شافوا مدى سرعة الزمن اللي حنا فيها.

وسالفتي عن السفر اللي أول كان يعتبر ترف لأن تكاليفه غالية شوي، بعكس الآن السفر صار أشبه بضرورة واحتياج للترفيه عن النفس والناس كلها صارت تسافر بفضل الطيران الإقتصادي وكمان كثرة الفنادق اللي جعلت الأسعار بمتناول الجميع .. وأول كان مفهوم السفر المدة تكون طويلة في الإجازة ولوجهة وحدة أو وجهتين أو ثلاثة بالكثير .. الحين صار السفر الخفيف لمدة 3 أو 4 أيام بس على مدار العام كل شهر شهرين نطمر لنا طمرة وكمان ممكن إذا ما سافرنا طبقنا الإتجاه الجديد في العطلات وهي الـ ستايكيشن staycation، ولكن المشكلة الحقيقية اللي تواجهنا هي إن السفر ما صار يلبي الحاجه له بمعني إننا أول نسافر وتستمتع بسفرتنا ونشاهد ونستكشف حقيقي حاجة ما قد شفناها ونصور ولين رجعنا حمضنا الصور وتفرجنا عليها وصارت لنا ذكرى حلوة في صناديقنا، ولكن الآن ما صار في عنصر الإستكشاف، لأن كل العالم تقريبا شايفينه في الإنترنت إما عن طريق الصور أو الفيديو أو عن طريق جوجل ستريت اللي نقدر نشاهد شوارع المدينة بالتفصيل .. يعني أنا يوم سافرت لأول مرة للشرق الأقصى وكانت وجهتي هونغ كونع، لأننا من ربع أوروبا .. فكنت متهيبه شوي لأنه شي جديد ولكن كل قلقي زال يوم استخدمت جوجل ستريت وشفت المدينة وانبهرت فيها ويوم سافرنا ووصلنا لهم مره عجبتي والحمد لله فيها أكثر بكثير من اللي جوجل ستريت عرضه علينا وإلا كان انحرقت علينا السفرة.

وأنا لأني كنت من الناس اللي تسافر بين فترة وفترة .. قلت ليش ما أوثق سفراتي في مدونتي وأعطي آرائي في الأماكن وأكتب عنها وهذي تعتبر هواية من هواياتي، ويوم كان هذا الشي فقط للمدونة كان فيه متعة أثناء السفرة ولكن من دخلت السوشال ميديا علينا أفسدت هذه المتعة لأن الموضوع صار إرهاق وكأنه شغل مو هواية ولا تسلية.

وخصوصا سناب شات اللي ياخذ الوقت كله وحتى إنه يعزل الشخص اللي يسنب عن باقي المجموعة، والحين كلنا صرنا سنابيين وكلنا صرنا نسنب كل شي.

الحين أنا بحاول أرجع أكتب عن السفر في المدونة أكثر من التسنيب وبكتب في مواضيعي في المدونة مع تزويدها بالمعلومات مع خبرتي وثقافتي في السفر والسياحة لتحقيق الإستفادة للكل والجميع لأني ما أبغى أفسد حياتي وحياة اللي معاي وأنا لاهية أسنب طول الوقت .. أوكي بسنب شوي بس مو بالشكل المكثف اللي كنت أسويه، لأن مش صحيح إن الإنسان يفصل عن واقعه الحقيقي للواقع الإفتراضي.

أنا ما أقول لا تسافرون .. إلا سافروا وسافروا وسافروا ودايم أناشد الكل إنه يسافر ويوسع صدره لأن السفر له فوائد كبيرة بس اللي أقوله إننا لا نضيّع أحلى الايام في إننا نوثق سفراتتا في مواقع التواصل الإجتماعية بشكل مكثف، إذا بشكل معتدل مو مشكلة بس إذا كانت بشكل مكثف وللتباهى إننا نسافر وإننا نروح ونجي لأن هذا الزمان ولى، والكل يقدر يسافر وخصوصا إن فيه عروض من وكالات السفر والسياحة لمدة 3 ليالي بسعر 1200 ريال شاملة تذاكر الطيران والتوصيل من وإلى المطار والإقامة بالفندق مع الفطور الصباحي!

طبعا كلامي هذا مش موجه لمشاهير السوشال ميديا ولا للناس اللي تعتبر السوشال ميديا مصدر رزق لها .. هذا للناس اللي مثلي ومثلكم واللي نسافر عشان تبغى نستكشف العالم ونرفه عن نفسها.