تجيكم السالفة

الظاطور: مشروع افساد يوم جميل صيفي ساخن !

هذا الموضوع كتبته من زمان في نادي بنت نت .. واليوم قلته في سناب شات عشان كذا قلت أحطه لكم في المدونة .. مع تمنياتي لكم بقراءة ممتعة 🙂

في صباح يوم جميل مشرق حارق من أيام صيف 2002 في رياضنا الحبيبه…

صحيت الصبح وكالعاده كلي تفائل وأمل ان اليوم احلا من بكره وكالعاده تفائلي يطلع كنه وجهي rolleyes …

قمت وقومت كل اهل البيت كالعادة …

محسوبتكم بثره ماتحب تقعد بلحالها ابد ….الآبدين

ويومي مثل كل يوم مافيه شي متغير الا ان درجات الحرارة في ازدياد ( هذا هو الشي الوحد اللي يتغير بالديره 🙂 )

المهم مدري وش جاني قلت بودي عبايتي على المغسله ( دراي كلين ) تخاف على عبايتها وهي من العويس …. ههههههههههههههههه 🙂

المهم جيت عند مشجب ( بموت من كلمة مشجب ) …مقدر استحمل 🙂 … واخذت العباية وقامت طاحت من يدي على الارض وجيت ابلقطها ( وكانت بالحركه بطيئه ) ما وعيت الا ذاك الشي البيج اللي طوله مصبع ونط في وجهي ….. والله ياصرخت صرحه اني بغيت اموت …. انواع الانثوال حسيت كل جسمي يرجف محسوبتكم تموت خوف من الظواطير ودايم الظوادير يحارشونها sad

ابي اسيطر على نفسي ….خلاص ما قدرت وحسيت اني خلاص ببتل طول عمري … بصير منثوله طول بسبب هالظاطور … وجت اختي … وهذي اللي يقالها متماسكه وهي الصاحيه فينا 🙂 يوم سألتني وش السالفه

قلت لها : ظاطور طلع من العبايه طار في وجهي…
قالت : اووو مااااي قاااااد ( تحب تحكي انقليزي واجد …. مدري وش بزعمها هههه ) ذس از ذا باد نيوز ايفر نفر مفر بفر ( كل انواع الإيفرات طلعت ) اي هيرد
يعني بالسعودي هذا اخيس خبر سمعته في حياتي…
وبعدين قالت : لازم نقضين عليه مستحيل انه يقعد في وسطنا
قلت لها :لا ياروح ماما محد ذابحه الا انتي…
قالت : (آي آم نت قانا كل ذس ليزرد) يعني بالسعودي اني مانيب ذابحه ذا الظويطير….

طلعت امي من صجتنا وعلمناها بالسالفه وكانت متماسكه بس ما تبي تشاركنا في الحمله اللي اتفقنا عليها انا واختي
تناقشنا وتحاورنا وقلنا لازم نجهز عليه في حين غره ( رمضان او ذو القعده مو مشكله )

وطلعت بنت خالتي من الغرفه تقول وش فيه ليه تصرخين وعلمناها وجهها انقلب وطاح قلبها في رجلينا ( ابد مو خوافه بنت خالتي) والبنت بنت نعمه الله حق في بيتهم ماقد شفنا ذا الشوفات بس لي جت عندنا تطيح على خمال…..

وجبنا العده كلها فوطه مبلوله وعصا مكنسه وفليت ( خبرة ظواطير ) احسن من بعض الناس جايين يذبحون الظاطور بمضرب تنس هههههههه) ترا ماهيب الناقه ههههههه 🙂 ( ملاحظة: الناقة هي لمى )

وأخيرا وليس آخراً الكشاف …. واركز الكشاف تحت الكراسي اشوف وينه فيه ولا فيه فايده
وتضاربت الأقاويل والاشاعات انتشرت انه راح غرفتي او انه راح ناحية غرفة ثانيه ودب الهرج والمرج … راحت اختي بكل حذر ناحية آخر مكان شفناه فيه عند الكرسي وكانت امي وبنت خالتي قاعدين عليه شالت الكشن ( مخدة الكرسي ) الا الظاطور يمشي عليه وصرخت بأعلى صوتها ومن نذالتها رمت الكشن والظاطو في وجه بنت خالتي … مقدر اوصف لكم وش جاها البنت قامت اتصرخ مصارخ متصل لمدة ربع ساعه تحسب ان الظاطو يمشي عليها وقامت تفصخ كل هدومها في الصاله وهي تصرخ وتناطط وحالتها تصعب عـ الكافر يعني بالعربي جتها حالة هستيريا… ومع صراخها ضيعنا التركيز وقدر ان الظاطور ينحاش … شوي الا بنت خالتي نفسها تأشر على شنطة الكروشيه حقت امي وتقول شفوه تحت شنطة الكورشيه قسم بالله شوفوه

وشنينا حمله ثانيه عليه بالفليت والشباشب ومافي فايده الدعوه مفاحط تعبنا وهي يفاحط من اول الموزع ( مكان لإجتماع الأهل والأسرة ) لآخره في ثانيه وحنا محنا قادرين نمسكه وآخر شي قمت انبطحت واراقبه تحت الكراسي وشفته وبخينا عليه فليت وكنه داخ شوي وفجأه اختفى……..

استناه يطلع …. ما طلع وانا منبطحه ما وعيت الا ذيك الصرخه بااااااااااااانت نت
والتفت الا هو وراي وناصيني الشيخ؟؟؟؟؟؟؟؟؟؟؟؟؟؟؟؟؟
والله ثم والله …..لولا الله ثم اختى ما قالت به بالنعال والا على بطحتى ان كانه دابي على …. وانتهى وضعي…. بس ربك رحيم المهم ابشركم تم القضاء عليه

ولو انه كان مشروع افساد يوم جميل من ايام صيف 2002 الرياض

وسلامتكم

محدثتكم هلا الجريد

السالفة بالصوت والصورة في سناب شات الآن : wainblog

الوسوم

مقالات ذات صلة