بكل بساطة حنا في وقت الـ ( سناب شات ) .. اللي أقدر أقول إنه أخذ الجو كله، ومن كل اللي اللي سبقوه

وهذا هو حال التقنية الحديثة كل ما طلع شي جديد يسحب البساط ممن سبقوه مثل ما حصل مع  انستغرام يوم حل محل التويتر وكمان التويتر يوم حل محل الفيسبوك وهكذا.

وشبكات التواصل الإجتماعي في وقتنا الحاضر بدأت بثورة التدوين وبعدها برزت شبكات مثل ماي سبيس اللي تكاد تكون اختفت ولينكدإن اللي تخصص في مجال الأعمال والوظايف.

وبعدها بدينا نشوف شبكات متخصصة بالصور مثل فليكر وعقبها ظهر اليوتيوب للفيديو .. وفي عام 2006 ظهر شبكة فيسبوك للتواصل الإجتماعي اللي لين الحين تدار بذكاء في محاولة للإستمراء سواء عن طريق الإبتكار أو عمليات الإستحاذ.

وظهرت شبكات تواصل إجتماعي مختلفة التخصصات مثل تويتر للتدوين المصغر و فورسكوير لمشاركة الأماكن وبيترست للصور المعلقة على الألواح وغيرها كثير.

وكل هذا قبل عالم التطبيقات اللي نافس المواقع الإلكترونية وشهد ظهور تطبيقات خاصة بالهواتف الذكية مثل إنستغرام اللي من 2010 وهو قاعد ياخذ حصة كبيرة من مستخدمي شبكات التواصل الإجتماعي على الهواتف الذكية، إلين ماظهر سناب شات وبدأت الناس تتجه لهذا التطبيق الجديد بفكرته الجديدة واللي أعجبت الكثير لأن ميزته إن مافيه شي ينحفظ في الجهاز سواء مُرسل أو مستقبل وكمان خصوصيته قوية لأن لو أحد عمل تصوير شاشة يعرف الشخص المرسل هذا الشي.

ولكن كيف دخلت هذا التطبيق اللي كان عبارة على تطبيق مراسلة فوري إلى عالم التواصل الإجتماعي .. هذا الشي حصل من سنة ونصف تقريباً يوم أعلنوا عن ميزة جديد وهي ( حكايات  Stories ) اللي تتيح للشخص عمل يوميات ممكن أي أحد يوشوفها لمدة 24 ساعة وبعدين تختفي وممكن تكون مقصورة على الأصدقاء أو على كافة الناس من خلال الخيارات اللي نحددها.

واللي يعرف كم عدد اللي شافوا اليوميات فقط الشخص صاحب الحكاية وبكذا اتجهوا مشاهير الإنستغرام إلى السناب شات اللي هو الإتجاه الجديد لأن نسبة الناس اللي تدخل وتشوف الإنستغرام صاروا أقل بحسب الإحصائيات، وعشان كذا لاحظنا إن فيسبوك وجوجل تنافسوا عشان يشترون التطبيق العام الماضي ولكنه مؤسس التطبيق (إيفان شبيغل) رفض العروض اللي كانت بمليارات الدولارات لأنه عارف إن تطبيقه يسوى أكثر من مليار أو 3 مليار دولار.

وأنا بدوري .. لي يوميات وصيداتي اللي أصيدها لكم كل يوم بدبي .. اللي يبغى يتابعني حياه الله في سنابي: WainBlog

wainblog-snapchat