اللقافة وما ادراك ما اللقافه، واللقافة للي ما يعرف وش هي ؟ .. هي بمعنى هي الحشريه، اللي يسأل ويتدخل في الشي اللي ما يعنيه!

المهم، اتوقع أنو مشكلة جماعتنا الأزلية هي اللقافه، يعني فيه بعض الناس تدخل بينك وبين جلدك يالإنسان،

ويمكنني كمان القول إن المجتمع فيه فئة كبيرة  قايمه على اللقافه .. وين رحتوا؟ وش شريتو؟ وين سافرتوا؟ وش شريتوا؟ وش جنسية سواقكم؟ ومن وين استقدمتوه؟ ومن أي مكتب؟

هذي سالفة من زمان صارت تقول وحده انو خواتها تجمعوا يلعبون في ملعب صابون ،، المهم وحده منهم تعورت في دقنها وطارو بها للحبيب ،، ” الحبيب = مركز طبي”

المهم وهم في الإنتظار ومرتبشين طيب وش نسوي وش نقول لأمها ،، لأن أمها مره حريصه عليها ،، ولو درت انها تعورت بتعصب عليهم مره،، المهم وهم مشتطين ويقولون لبنت خالتها انتي تصرفي وقولي لها.

المهم وحده كانت في الإنتظار ما يعرفونها ،، إلتفتت عليهم وسألتهم وش فيكم .. وش صار .. وش فيها البنيه ؟

قالوا لها : لا .. بس طاحت !

قامت قالت : من الدرج ؟

قالو : لا، في ملعب الصابون ..

قالت : وش ذا ملعب الصابون ؟

قالوا : هذا ملعب فيه صابون و الناس تلعب وتتزحلق عليه ؟

المهم انها تركت سالفة هالبنت المصابة واللي متعوره والتفتت على ملعب الصابون !

وأسالة كثيره تدور كلها وتحوم حول ملعب الصابون ..

آخر المتمه قالت لهم : ساد ! يعني تستاهلون أو أحسن !

بالله عليكم وش رايكم ؟