تجيكم السالفة .. هما إن إيفا لانغوريا أول مره تزور دبي .. قلنا نقوم بالواجب .. ولازم نشوفها ونتحفا فيها .. المهم عشان تنصور مع إيفا لانغوريا لازم كل أحد يشتري مشتريات مع بلومينغديلز بـ 1800 درهم عشان يتصور معها النفر الواحد .. وكنت أمس في دبي ورحلتي كانت الساعة ثمان بالليل للرياض، وهي بتكون موجوده من 4 العصر إلى ما ينتهون المعجبين من التصوير معها .. شريت تذاكر أنا وصحباتي مي ومضاوي بنات عم لمى صاحبة مدونة “ترندي فلامينغو – Trendy Flamingo”  كل وحده شرت مشتريات بـ 1800 عشان تتصور معها . وعلى قولة المثل حج وقضيان حاجة يعني حنا فينا فينا نشتري هدايا لأهل الرياض فصارت الهدايا هالمره من نصيب متجر بلومنغديلز عشانه جاب لنا إيفا لانغوريا.

جينا قبل الموعد بساعة عشان نمسك طابور ونكون أول شي عشان ماتفوتنا الطيارة .. ومسكنا طابور وقالولنا إنها بتجي الساعة 4 وطبعا هوجسنا وخفنا إنها تتأخر مثل ربعنا تخبرون من أهم صفاتنا التأخير في المواعيد وإلا ما نعرفنا لو جينا في الوقت.

المهم  إنهم أخذو منا التذاكر وقالو لنا أكتبو لها رسالة وهي بتاخذ الرسايل اللي بتكتبونها لها، ماعرفت وش أكتب لها قمت كتبت “welcome in Dubai” حسيتني ماعندي سالفه أبد .. وصفينا في الطابور وفيها ناس كثير مثلنا جايين ومتحمسين يشوفونها .. والغريب أنو ماكان فيه دعاية كبيره لإيفا لنغوريا على زيارتها لمتجر بلومينغديلز مثل الدعاية اللي حاصله لكيم كرداشين اللي راح تجي في يوم 15 وهي ما أتوقع إني أحضر لأني حكون في الرياض وقتها إن شاء الله.

نرجع للسالفه .. ما شاء الله الساعة أربعة مش أربعة إلا دقيقة .. ولا اربعة و دقيقة .. اربع يعني اربع .. انفتح الأصنصير وطلعت علينا لابسه فستان فوشيا وراحت قعدت في المكان المحدد لها عشان تستقبل الرسايل من المعجبين اللي اشتروا تذاكر للتصوير مها وباقي الناس كانوا بعيدين شوي بس يقدرون يشوفونها من بعد.

وبدا ياخذوا الناس واحد واحد للتصوير وجا دورنا أنا وصاحباتي وفجأة لقيتني أختبصت ! وقامت مضاوي اللي يهديها دفتني وقالت إنتي يا هلا أول وحده !

مشيت لها ويوم وصلت قالت لي : “Hi Hala” هي قالت هاي هلا وإلا ما قالت .. هذا آخر علمي في عمري وعقبها “غيبت” ما عاد أشوف.

قسم بالله العظيم إني ما دريت وش إني أسوي لا عاد شفت أشباهها ولا شفت أشباه الناس ولا عرفت وين الكاميرا اللي بتصورني .. هي تناظر ناحية الكاميرا حقت التصوير وأنا أناظر في الجهة المقابله .. طبعا صاحباتي كانو يصوروني بكاميراتهم والرجال يصور بكاميرتي أنا أناظر صاحباتي وهي تناظر كميرتي .. الحرمه مركزة وأنا متدودهه.

وصديقتي مي البلاك بيري حقها علق ولا صورت واختبصت تبي تطلّع الكاميرا عشات تصور منها إلا بيكون خلص دوري في التصوير .. و مضاوي تحلف بالله إنها تبغى تضغط على الزر حق الكاميرا ,, أصبعها شبص على فوق ولا صار يتحرك .. ولا قدرت تضغط على الزر خافت ينكسر أصبعها من حالة التشنج اللي جتها .. يعني بالعربي جتنا حالة من الإختباص والإنثوال مش طبيعيه .. وجا بعدها دور مي ومضاوي و أنا يوم كان دوري كنت مره بعيده عنها ومستاحشه شوي بس مي ومضاوي قاموا يسلمون عليها ويمسكون فيها ويسولفون عليها .. أنا إنطلقت على برا أبي كل شي ينتهي وأبي أفوق خلاص من بعد التغييبه .. إلا مي تزاعق يا هلا إرجعي نبغى صوره ثلاثيه ..

الحرمه اللي إنتي يا إيفا طارت بوهتها وش ذا العالم اللي تزاعق .. يعني بالمختصر حنا فقدنا السيطره على أعصابنا بالكامل.

بس الحمد لله رجعت وصورنا صوره ثلاثية وإنتهت المهمة على خير.

ملاحظة .. البنات مايبون صورتهم تنشر عشان كذا طمست الملامح .. ياعيني على الفوتو شوب

وتجيكم الصور بس العذر والسموحة بعضها مغبش وبعضها ما يواجه .. بس على الحاله اللي كنا فيها .. تعتبر الصور إنجاز!

 

هذي الصورة قبل لا نوصل للطابور صونا مع البروشور الدعائي للحملة

أبشركم هذي الصوره مضاوي مصوره قفاي مع الحرمه وهي توقع

هنا أول ماطلت علينا


وهذي الصوره اللي قلت لكم عليها هي تناظر يسار وأنا يمين يعني كن مالي سنع أبد

وهذي سلمكم الله فعالية نيويورك نيويورك اللي إفتتحتها إيفا لانغوريا

وهذا تاكسي نيويورك الشهير قدام متجر بلومينغديلز.

وهذي صورتها اللي موقعتها مع كتابة اسمي عليها 🙂

وتوته توته خلصت الحتوته ,, بس كل اللي بطلبه منكم إنكم تسترون علينا أول مره نقابل مشهور من مشاهير هوليوود .. طول الوقت نقابل مشاهير العرب ولا جانا شي مثل كاظم وأصاله وراغب وإليسا وعباد ونبيل ورويشد وفايز وأحلام وغيرهم كثير نقابلهم في أمكان عامة وعادي حصل خير .. بس سبحان الله يوم السالفه فيها هوليوود إختبصنا ..

بس السؤال .. أجل لو شفت مشهور من مشاهير بوليوود وش كان بيصير فيني .. كان بيغمى علي ههههههههههه.