العالم أصابه الملل من الشركات الكبيرة واللي منتشرة في كل مكان و تبيع الناس الأكل الغير صحي واللي يطلقون عليه ( Junk Food )، واللي يكون في الغالب غني بالدهون المشبعة وما فيه أي فايده.

وكمان أصابنا الملل من تكرار نفس المحلات في كل الأماكن .. أنا أحب إن يكون في تميّز ويكون فيه تغيير وشي تنفرد فيه كل مدينة عن الثانية وهذا الشي كثير نلاقيه في أوروبا وأمريكا .. بس الشي هذا عندنا قليل.

والحين فيه إتجاه جديدة في أوروبا وأمريكا وهو الـ ( Food Truck ) والفود تراك هذا عبارة عن مطاعم متنقلة لأنه شاحنة في الاساس ومتزينه بألوان جذابة ورسوم جميلة جداً تلفت الأنظار بحيث تبهر المارة و بالعادة تتواجد في الأماكن اللي فيها ناس كثيرين مثل مناطق الأعمال أو المزدحمة بالسيّاح .. وعلى الغالب كل عربة تقدم طعام مختص يعني مثلا عربة تقدم برجر والثانية تقدم كريب أو وافل وغيرها تقدم تاكو وكذا يعني وبعضها يكون سندويتشات مختلفة وأهم حاجه إنها كلها تعتبر صحية وطازجة ومن مكونات جيدة وشهية وكثير اللي يشتغلون فيها يكونون هم أصحابها ..

أتمنى إننا نلاقي في دبي ..مدينتنا اللي تواكب كل إتجاه جديد في العالم وتجلبه في أسرع وقت إننا نشوف مثل هذي الشاحنات في وسط مدينة دبي قلب العالم الحاضر أو في الأماكن المطلة على البحر أو في الحدايق العامة أيام العطل الأسبوعية أو في دبي مارينا المنطقة المفضلة للسياّح من كل أنحاء العالم.