لو نلاحظ دائماً ما نعيش حالة من الإتجاهات الجديدة في عالم الموضة والديكور والطعام  اللي أصبحوا ملتصقين في بعض في الآونة الأخيرة، ومثل ما عالم الأزياء له مشاهير أصبح الآن لعالم الطهي نجوم يضاهون غيرهم من المشاهير في كل المجالات المختلفة وكذلك عالم الديكور.

والحين دارجه موضة جديدة أو ما نسميها حنا عندنا في الخليج هبه جديدة .. والإتجاه الجديد هذا يسمى ” العشوائية المتقنة ” !

تقولون لي ماهي ” العشوائية المتقنة ” ؟

أقولكم ياطويلين العمر، هي في المجالات اللي قلت لكم عليها أنو يبان كأن الشي ماهو مرتب ولكنه في الواقع هو مصنوع بقمة من الإتقان يعطينا الإحساس بالراحة لمعرفتنا بجودته ويعطينا كمان الشعور بالإنطلاق والحرية ..

ولو بفصّل أمثلة .. وأعطي من كل مجال مثال; في الأول مثلاً لو نشوف الحين البرجر كيف يكون يكون شكله ماهو مضبوط مثل إعلانات من أول في الصور اللي كانت دارجة في العصر الماضي ..لا وكمان الحين البرجر لازم يتقدّم وتكون اللحمة مو متساوية والأفضل إنها تكون شكلها كأنه طبيعي جداً وكأن شي عادي إنها تكون مو متقنة الصنع ولكن في الحقيقة هذا مو عادي .. هذا معمول من أجود المكونات لمذاق لا يقاوم ولكن الشكل يكون مو مرتبوالبطاطس يفضل تكون في سلة من حديد عشان يكمل الشكل اللي يجيب راسنا.

ومثلا في عالم الأزياء.. نجي لبنطلون الجينز .. يجي لنا الجينز مرقّع وحالته حاله ولكن هذا هو اللي لازم يكون عليه، بس لما نجي لطريقة الخياطة ونوعية القماش نلاقيه من أفضل ما يكون .. بمعنى إن طريقة الأزياء اللي كانت في الماضي ماهي موجودة الحين .. كأن فيه عودة للطبيعة أكثر وهذي هي الموضة الجديدة إن الإنسان يندمج أكثر مع الطبيعة.

نجي عاد للديكور اللي أكثر شي واضح في هذا الإتجاه، يعني مثلا نلاقي مطاعم ديكوراتها كأننا داخلين مصنع .. مواسير في كل مكان لمبات متدلية من السقف بشكل عشوائي وكتابة على الجدران بالطبشور وخشب غير مصقول، ولكن في الحقيقة الديكور هذا مرة مكلف ومرة متقن عشان يظهر بالشكل الغير متقن .. وهذا جمال في التضاد في حد ذاته.

وكمان حنا صارت تستهوينا هالأماكن اللي من الطبيعة وطبيعية وألوانها مريحة .. وتستهوينا الملابس اللي تبان كأنها عادية وهو مش عادية وطبعاً أولا وأخيراً يستهوينا المذاق الشهي والرائع قبل اي شي.

وش رايكم في هذا الإتجاهات الجديدة .. ووش كمان لاحظتوا من إتجاهات جديدة غيرها في وقتنا الحالي؟