البارح رحت أشوف مباراة كأس العالم اللي بين إنجلترا و أوروغواي في “ريال مدريد كافيه” اللي توه فاتح في ذا بيتش (JBR) في دبي، والكافيه قد نوهت عن إفتتاحه في المدونة قبل أسبوع في هذا الموضوع : ( إفتتاح ريال مدريد كافيه في ذا بيتش #دبي )  واللي كنت وقتها شفته بس من الخارج وقلت خليني أجربه في هذي المباراة .. الكافيه ديكوره مره عصري وفيه شاشة كبيرة في الطابق الأول وكمان شاشة كبيرة في الطابق الثاني وفيه قسم لبيع منتجات وقمصان فريق ريال مدريد وكمان فيه شاشات صغير منتشرة في المكان وتراس في الطابق الثاني.

يوم رحت ما كان فيه إلا في طاوله على الممر .. وأتوقع إنها أسوء طاولة في المكان .. الغريب إني متصلة وحاجزه واللي أخذت مني الحجز قالت لي طاولتك ممتازه في الطابق الثاني قلت طيب وصدقت.. ويوم وصلت .. اللي واقفه على الباب قلت لها أنا عندي حجز بأسم فلانة قامت حاست لين ما لقت الأسم وبعدها قالت لي إيه تعالي وراي .. تبعتها .. ويوم وصلت الطابق الثاني وقامت تلفلف على الطاولات .. ماعرفت أي طاوله هي الطاولة اللي حجزناها ! أو إن طاولتنا تم أخذها وبلشت وعطتنا طاولة مرة ما تنفع لأنها في الممر والناس تتخاطف قدامنا لا عرفنا نتفرج على المباراة .. والله يعزكم أي أحد يروح الحمام يمر من قدامنا .. غير إن اللي يخدمون عليها صاروا سبب إزعاج لأنهم يوقفون قدامنا مباشرة ويحجبون الرؤية.. قلبوا علينا الفرجة نكد في نكد.

تجربتي سيئة جداً في الكافيه مو عشان الحظ العاثر اللي حطني في هالزاوية الغربية .. لكن كمان الأكل ما هو ذاك الزود .. البرجر عادي جداً و أقل من عادي ! ومن حومة كبدي ما أخذت صورة للطبق .. لأن طول الوقت متحلطمه على الموقع الشين للطاوله اللي عطونا هي!

يعني في يوم جميل مثل أمس وفازت الأوروجوي .. وأتوقع إن هذا العام بيتحقق حلمي اللي حلمته من زمان إن الأوروغواي أو الباراغواي وحده منهم اللي بتفوز بالمونديال .. ولكن الباراغواي ما تأهلت أساساً تصيرالأوروغواي اللي في الحلم كنت أشوف اللون الأزرق السماوي وهو لون لبسهم وعلمهم !

يمكن أحلى شي في الكافيه ديكوره وموقعه .. أما الأكل فهو عادي والخدمة ممكن أقول عنها إنها عادية وأقل من عادية بس هم مختبصين لأنهم توهم فاتحين، لكن ماهو عذر .. أهم شي في المطعم بعد نوعية الأكل الضيافة وآخر شي الديكور اللي هم ما قصروا فيه.

ما أطن إنه بيكون من أماكني المفضلة في دبي رغم إني من مشجعين الريال مدريد .. بس تجربتي الشينة .. وحومة الكبد اللي جتني بتصددني عنه.