الاسبوع الماضي رحت زرت معرض ( سيتي سكيب Cityscape ) في مركز دبي التجاري العالمي .. وش اقولكم .. طارت عيوني في المعرض .. مدري وش أشوف وش أخلي .. بصراحة اللي ناوي يشتري عقار ملك في دبي صعب عليه الإختيار .. لان الخيارات مرة كثيرة وكل خيار أحلى من الثاني ..

يعني اللي يعزّم يشتري لازم يجي من بدري ويلف فيه على رواق ويآخذ البروشرات عشان يمزمز عليها في البيت ..
أنا ياوحده .. أول مرة أحضر معرض عقاري .. بصراحة المشاريع القادمة لدبي شي مذهل حقيقي .. ودريت إنهم بيستأنفون العمل في النخلة ديرة مع تغيير اسمها إلى ( جزيرة ديرة ) وبتكون اربع جزر يعني تم إلغاء شكل النخلة .. و أكثر شي لفت نظري قناة دبي المائية و عجلة دبي اللي قبال الجي بي آر في جزيرة بلو ووتر .. و بصراحة شي جميل والمشروع كله إضافة حلوه للجي بي آر بعد ذا بيتش اللي أتوقع له كم شهر وبخلص إن شاء الله. طبعا مدينة محمد بن راشد شي رائع لأنها فيها اسطبلات خيول وبحيرة كبيرة .. ومشروع فالكن سيتي وتوسعات منطقة وسط دبي برج خليفة .. وغيرها كثير من المشاريع لو تكلمت من الحين لين بكرة مو مثل اللي يحضر المعرض ويشوف بنفسه .. شي مذهل .. ومع إني ما صورت كل شي في المعرض لأنه مره كبيرة وكمان لأني جيت متأخره وفي آخر يوم يعني لحق ما تلحق .. عشان كذا إن شاء الله ماني بغلطانه مثل هالغلطه إني أجي أي معرض على آخر شي .. لأنه شي متعب حقيقي ..