قبل يومين تقريباً وصلني إيميل من أوبر Uber .. وهي خدمة طلب تاكسي بسيارات فاخرة والدفع عن طريق البطاقة الإئتمانية وقد كتبت عنها في المدونة موضوع بعنوان ” تطبيق ( أوبر Uber ) لطلب سيارات تاكسي الليموزين .. الآن في #دبي “.

والإيميل كان عشان يبلغون كل مشتركينهم إنهم وفروا خدمة جديدة في دبي وهي UberX واللي هي بالضبط مثل أوبر البلاك ولكن هذي بسيارات مش فاخرة مثل ذيك يعني مش بي إم دبليو أو أودي أو لكزس .. بل تجيك سيارات أقل رفاهية ولكن بنفس جودة الخدمة اللي تقدمها أوبر .. وهذي صورة فيها مقارنة بالسعر بين أوبر البلاك العادي وأوبر إكس:

uberx-rates

وعن تجربتي الشخصية أقدر أقول إنها كانت أكثر من رائعة لاني طلبته من نفس تطبيق أوبر البلاك بس هم أضافوا زر من تحت إذا لفيته ناحية X يجيك تاكسي الت X وإذا كان من ناحية البلاك بتجيك السيارات الكشخه .. وكانت المسافة اللي تبعد عن المكان اللي أنا في 8 دقائق لين ما وصل بالضبط على ما وين أشرت له بالدبوس الأزرق، وجتني سيارة كرايسلر 300 سوداء نظيفة وجديدة والسواق على طول توجه المكان اللي قصدته ..

واللي يبغى يستعين بهذي الخدمة كل اللي عليه إنه ينزل التطبيق من متجر أبل أو جوجل بلاي والتسجيل ووضع بيانات البطاقة الإئتمانية وكل رحلاتكم في أوبر يتم خصمها من البطاقة على طول ولا في داعي لحمل النقود.